Bafuna uthisha owazi isiZulu
ISIGUNGU esilawula isikole iSol Primary eJolivet sesibhalele uMnyango wezeMfundo sifuna ukulethelwa omunye uthisha ozofundisa uGrade 2 ngoba olethwe ngumnyango ungumXhosa.
Lesi sigungu sibe nomhlangano izolo nabomnyango lapho siveze khona ukungenami ngokulethelwa lo thisha ngoba sithi akasazi isiZulu ekubeni kulesi sikole kufundwa ngesiZulu.
UNksz Fikile Zondi, iPhini likaSihlalo walesi sigungu uthe abacwasi kodwa bafuna umuntu ozofundisa ngesiZulu ngoba izingane ezincane zifunda ngalolu limi.
Uthe babhalele umnyango ngoba bafuna ukulethelwa omunye uthisha.
“Lo owalethwa ngumnyango uzisholo yena ukuthi uzoba nenselelo ekufundiseni ngesiZulu. Sizolinda wona umnyango ukuthi ulungise lolu daba ngoba sishoda ngothisha ozofundisa iFoundation Phase,” kusho uNksz Zondi. Uthe bayile esikoleni izolo ukuyobheka isimo base behlangana nabomnyango nothishanhloko ngalolu daba.
“Kukhona umbono obuthi uzoyiswa kwiSenior Phase le agogode kuyo, ayifundise bese kwenziwa izinguquko kushintshwe abanye balethwe kwiFoundation ukuze yena aqhubeke kulokhu agogode kukho. Kodwa thina asishodi kuSenior Phase sishoda ngothisha weFoundation yingakho sifuna ukulethelwa uthisha ogogode kulowo mkhakha,” kuqhuba uNksz Zondi.
Uthe kuke kwaba nezikhalo ngesiZulu esifundwayo yingakho befuna umuntu olwazi njengoba ezazi lolu limi.
Okhulumela uMnyango wezeMfundo, uMnuz Sihle Mlotshwa, uthe isigungu sibize abahloli nezinyunyana zothisha ukuzobeka isikhalo mayelana nothisha esimfunayo.“Wudaba esilwaziyo futhi esilulungisayo ngokushesha,” kusho uMlotshwa.