Inyanga ebulale umakhelwane igwetshwe 24 weminyaka
IGWETSHWE iminyaka engu-24 inyanga elahlwe ngecala lokubulala umakhelwane wayo owayibamba egcekeni inqunu.
UBonginkosi Gadlaphi Vilakazi (25) ugwetshwe izolo eNkantolo eNkulu eMgungundlovu ngecala lokubulala uMnuz Sphelele ‘Bee’ Vilakazi (27).
Lesi sigameko senzeke ngoMashi 5 nonyaka eThafamasi, eKranskop.
Ijaji Pieter Bezuidenhout likhipha isigwebo lithe lizomxolela lo mbulali lingamnikezi udilikajele.
“Isigwebo esisemthethweni secala lokubulala kuhleliwe ngokomthetho wakuleli, udilikajele kodwa wena ngabe akubona ubulungiswa ukukugweba udilikajele ngoba kuyavela ebufakazini obusenkantolo ukuthi lokho wakwenziswa ukudinwa nokuthathela phezulu izinto kulandela ingxabano owaba nayo nomufi. Yize kunjalo kumele uhlale isikhathi eside ejele ukuze ufunde ukuthi ukubulala umuntu icala elibi,” kusho uBezuidenhout.
Ugwebe lo mbulali iminyaka engu-20 ngecala lokubulala nemine ngelesibhamu esingekho emthethweni. Le minyaka uzoyidonsa kanye kanye.
Ijaji lithe ukuba namakhosikazi amabili, izingane nokusebenza njengenyanga elaphayo emphakathini kwakumele kumenze acabange kangcono kunalokhu akwenza.
“Kuzokusiza ukuhlumuleliswa kwesimilo sakho ukwazi nokuzibamba uma udiniwe,” kusho uBezuidenhout.
Ngokobufakazi obusenkantolo umbulali wabanjwa wumufi enqunu emzini wakubo. Wabaleka umbulali. Ngakusasa wahlangana nomufi komunye umcimbi, balwa wahlulwa umbulali. Balanyulwa babe sebehlukana. Ngosuku olulandelayo umufi esesitolo kwafika umbulali ehlome ngesibhamu wamdubula kathathu kubuka umphakathi. Umbulali wabaleka endaweni yesigameko. Waboshwa amaphoyisa, icala laqulwa laze lamlahla.
Umfowabo omdala kamufi, uMnuz Khulekani Nduli uthe yize bejabule ngesigwebo kodwa ngeke simbuyise umfowabo.
“Okubuhlungu ukuthi uzohlala ejele bese eyaphuma aqhubeke nempilo umbulali. Thina salahlekelwa umfowethu, ngeke esavuka. Le nyanga yayivele isisongela ukuthi izohlala ejele bese iyabuya. Asazi uma isibuya iyowenzani umndeni wethu njengoba umsuka wale nkinga kwaba ukufika kwayo ekhaya inqunu. Asazi yayizokwenzani ebusuku. Asikholwa ukuthi siphephile,” kusho uNduli.