Ikhwelo ngokufundiswa kweHistory
USIHLALO wenguyazana ye-ANC ebhekele imfundo eyisisekelo ePhalamende, uNkk Nomalungelo Gina usehlabe ikhwelo lokuthi kusheshiswe eyokufundiswa kweHistory kuzona zonke izikole zakuleli.
Kuzokhumbuleka ukuthi ithimba elajutshwa nguNgqongqoshe weMfundo eyiSisekelo uNkk Angie Motshekga laphakamisa ukuthi lesi sifundo sibe yimpoqo kubona bonke abafundi kusuka kwaGrade 10 kuya kwa-matric.
UNkk Gina uthe kumele ngabe kade saba yimpoqo lesi sifundo ezikoleni.
“Lesi sifundo sineqhaza elibalulekile ekwakheni isizwe, ukwenza abantu bathande izwe labo. Izosiza ekutheni abantu bafunde ngezinselelo ezazikhona ukuze izwe lithole inkululeko,” kusho uNkk Gina ophinde abe nguSihlalo wekomiti lezemfundo eyisisekelo ePhalamende.
Uthe lesi sifundo kumele sikhulume ngezinto ezizohlanganisa isizwe, sikhulume ngokungalingani.
“Kumele sikhulume ngokuthi kufundwe uhlelo olungenakho ukucwasa. Sizonyusa izinga lomfundi lokucabanga nokuhluza.”
Ithimba likaNkk Motshekga laphakamisa ukuthi lesi sifundo sifundwe ezikoleni kusuka ngo2023.
Laphakamisa ukuthi abafundi bayeke iLife Orientation uma sebefike kwaGrade 10 ukuze benze iHistory. Okwamanje abafundi benza iHistory baze bafike kwaGrade 9 bese abanye beqhubeka nayo, abanye bangaqhubeki nayo benze ezinye izifundo.
UNkk Gina uthe kunombiko othulwe ePhalamende kuleli sonto obuveza ukuthi kungenzeka kube nezinselelo ekubhalweni kwezincwadi zalesi sifundo nokushintshwa kohlelo lokufunda, ukuqeqeshwa kwabo kanjalo nokugaywa kwezincwadi zalesi sifundo.
“Siyanxusa kodwa ukuthi kusheshiswe yonke into kusetshenziswana nomnyango wemfundo ephakeme ngalolu daba. Akufakwe zonke izinhlaka kulolu daba okubalwa nezinyunyana zothisha. Kumele kufundiswe abafundi ukubaluleka kwalesi sifundo.”
Izinyunyana zothisha zakwamukela ukuthi lesi sifundo sibe yimpoqo kuze kufinyelele kwa-matric ukuze abafundi bazi ukuthi izwe liphumaphi.