‘Miningi imikhakha emaphoyiseni’
IPHINI likaKhomishana wamaPhoyisa kuzwelonke uLt General Fannie Masemola linxuse intsha ukuba ingene emkhakheni wamaphoyisa lathi maningi amathuba emisebenzi akhona.
Ekhuluma emcimbini kazwelonke wombukiso ngomsebenzi wamaphoyisa eKings Park Stadium eThekwini izolo, uMasemola uthe maningi amathuba omsebenzi akhona adinga ukuthi abantu bafunde.
“Miningi imikhakha emaphoyiseni. Emaphoyiseni sinabantu abashayela amabhanoyi. Kukhona nabameli ngaphakathi neminye imikhakha. Kubalulekile ukuthi abantu abasha benze ucwaningo ngemikhakha esinayo ukuze basebenzise lawa mathuba akhona,” kusho uMasemola.
Uthe umsebenzi wamaphoyisa ubalulekile yingakho nawo ubalwa nasesigabeni somthetho uSection 205, woMthethosisekelo wezwe. “Ukuze uphumelele emaphoyiseni kumele ube ngumuntu oziqoqile futhi ohloniphayo othatha imiyalelo yalabo abakuphethe.” Uthe emaphoyiseni alubikhona ukhetho lwezikhundla kodwa abantu bayaqokwa ngenxa yamagalelo abo.
UMasemola uyena obehola ithimba likazwelonke ebelihambele umbukiso.
UMnuz Lungelo Zulu weYouth Crime Prevention Desk esebenzisana namaphoyisa naye uhambe emazwini kaMasemola wanxenxa intsha ukuthi ingawubukeli phansi umsebenzi wamaphoyisa.
“Miningi imikhakha ekhona emaphoyiseni, njengoba kukhona abasebenza ophikweni lwezobuchwepheshe kuphinde kube khona nomakhenikha abakhanda izimoto zombutho,” kusho uZulu.
Abantu abebehambele umbukiso babheme bakholwa ngesikhathi izinhlaka ezehlukene zombutho zikhombisa ngemisebenzi yazo.
Kuqale uphiko olubizwa ngeSpecial Task Force, okuwuphiko oluphezulu lwamaphoyisa olusebenzisa amapharashuthi. Lolu phiko luvamise ukubizwa uma kunomuntu ovalele abantu ebhilidini noma endlini ebasabisa ngokubabulala.
ISpecial Task Force, ilandelwe uphiko olulwa nothuthuva emphakathini iPublic Order Policing (POP), lona obelwenza umbukiso kungathi luhlakaza abafundi abanodlame ababhikishayo. Kungene uphiko olubizwa ngamabharethi, iTactical Response Team (TRT) luhambisana nophiko lwezinja belingisa isigameko sokubanjwa inkunzi kuhlonyiwe.
Omunye wabafundi abebehambele umbukiso, uSakhile Mchunu wasePhoenix, uthe uhlabeke umxhwele ngakubone kwenziwa amaphoyisa. Uthe naye useyafisa ukuba yiphoyisa ngemuva kokuzwa ngamathuba angaphakathi kulo mkhakha.