Bazonaba ngemisebenzi yeBiotechnology
UBUCHWEPHESHE obusha bunendima ebalulekile ekuthuthukiseni izinga lokukhiqizwa kwemithi nemikhiqizo yezolimo e-Afrika.
Lokhu kushiwo uDkt Konji Sebati ozobe ekwabesifazane abazobe beshiyelana inkundla bechaza ukuthi ubuchwepheshe obaziwa ngeBiotechnology busiza kanjani ekuthuthukiseni izinga lokukhiqiza imikhiqizo ethize e-Afrika.
UDkt Sebati, oyisikhulu esiphezulu enhlanganweni yamakhemisi akhiqiza imithi kusetshenziswa ubuchwepheshe obusha, i-Innovative Pharmaceutical Association of South Africa (IPASA), uzobe ekhuluma engqungqutheleni yokuqala kuleli, iBio Africa Convention ezobe iseThekwini, ngoMsombuluko kuya kuLwesithathu.
UDkt Sebati uthe kule ngqungquthela, okuzobe kunezithunywa zaseAfrika nezasemazweni aphesheya, kuhloswe ukuthi kuqhanyukwe nezindlela zokuthuthukisa umnotho kusetshenziswa ubuchwepheshe obusha emkhakheni wezolimo, owezempilo nesayensi.“Ikhona imikhakha esiqalile ukusebenzisa lolu hlobo lobuchwepheshe ukuze kuthuthukiswe izinga lokukhiqiza imithi yokwelapha umalaleveva, imigomo elawula ukukhiqizwa kwembewu yokutshala kusetshenziswa ubuchwepheshe (GMO seeds), kusungulwe nesikhungo sokwenza ucwaningo, iNational Research and Development Centre,” kusho yena.
UDkt Siyabulela Ntutela, isikhulu esiphezulu seBio Africa, uthe uDkt Sebati uzobe eshiyelana inkundla nabanye besifazane kubhekwa ibanga eselihanjiwe, imigomo esikhona nokuthi iBiotechnology ingasetshenziswa kanjani ukuthuthukisa ezomnotho kubhekwe nokuthi kwamanye amazwe kwenziwa njani.