Babuyela enkantolo abasolwa ngokubulala eNquthu
BAZOBUYELA namuhla eNkantolo yeMantshi eNquthu abamangalelwa ababili ababoshelwe icala lokubulala nelokuzama ukubulala.
Abamangalelwa abaneminyaka engu-35 no-43 bavele enkantolo ngoLwesithathu icala labo lahlehliselwa inamuhla ukuze bafake isicelo sebheyili. Babhekene namacala amane okubulala nelilodwa lokuzama ukubulala. Okhulumela amaphoyisa KwaZulu-Natal uLt Colonel Thulani Zwane uthe omunye wabasolwa uboshwe ngoLwesibili eNquthu kwathi owesibili wazinikela esiteshini samaphoyisa ngoLwesithathu ekuseni.
Basolwa ngokubulala oMnuz Philani Mabaso (32) owabe enguSihlalo we-IFP egatsheni laseJabavu, Nhlakanipho Msomi (25) owayengumshana kaMabaso, Simphiwe Dlamini (30) owayengumakhelwane noMuzikayise “Nkomo” Zulu (25) waseVryheid, owayengumngani kaMabaso. Kulesi sehlo kwasinda unina kaMabaso.
Kuthiwa kusolwa ukuthi abasolwa babanjiswe yiselula kaMabaso, eyasala emotweni ngesikhathi bebulawa.
Kulesi sigameko kuthiwa abasolwa bahlangana nemoto kaMabaso , bafica phakathi uZulu, uDlamini noMsomi.
Kuthiwa babehambise itende komunye umuzi owawunomcimbi njengoba uMabaso ebeqashisa ngamatende.
Kuvela ukuthi abasolwa bafika emotweni badubula laba abathathu emakhanda bebalalise phansi.
Kuthiwa basuka lapho bahamba ngemoto kaMabaso baya kubo bafike badubula unina ethangeni, badubula uMabaso ekhanda ngezinhlamvu ezintathu babaleka
Kuvela ukuthi omunye wabamangalelwa wakhohlwa iselula emotweni kaMabaso okuyiyo elekelele uphenyo lwamaphoyisa.
UNksz Mbali Mabaso womndeni uthe bazizwa belapheka emoyeni ngokwenziwe amaphoyisa.
Uncome umsebenzi wabaphenyi baleli cala.