Idinga ukujulelwa eyokuhlaselwa kwabokufika
SIYENQABA ukuphela isihlava sokucwasa nodlame lokuhlaselwa kwabokufika. Zilokhu ziba khona futhi sizibika izigameko zokucwaswa nokuhlaselwa kwabo. Esakamuva okube ngesaseNanda lapho kushiswe khona isitolo sabadabuka eSomalia asebezinze kuleli bavula nebhizinisi.
Ngokuthola kwephephandaba, abahlasele bashisa kulesi sitolo bebekhala ngokuthi ibhizinisi liwisa amanye ngoba kushibhe kakhulu abakudayisayo.
Naseminyakeni eyedlule, ngenkathi kubheduka udlame lokuhlaselwa kwabokufika, isizathu esasizwakala kwakungesokuthi baqeda imisebenzi ngoba bayavuma ukuqashwa ngemali encane kakhulu.
Le nkinga yokuhlaselwa kwabokufika idinga uhulumeni ayibhekisise futhi ajule ngoba ayivumi ukuphela.
Udlame, noma lwaluphi uhlobo, alwamukelekile futhi abenzi balo kudingeka bajeziswe noma ngabe bakuliphi izinga.
Kubalulekile futhi nokuqwashisa abantu bakuleli ngokucwasana, ukubekezelelana nokuhloniphana.
Kule nkinga yokuhlaselwa kwabokufika makungabhekwa kuphela izigameko zokuhlaselwa kwabo kepha makujulwe kuxazululeke nezimo eziholela ekuhlaselweni kwabo.
Uma abantu - okungacaci noma bangosomabhizinisi yini - bekhala ngamabhizinisi nomsebenzi oqedwa ngabokufika, kumele izinhlaka ezithintekayo ekuthuthukisweni kwamabhizinisi kube khona ezikwenzayo.
Nabo osomabhizinisi abakhala ngokuqedelwa amabhizinisi kumele babhukule babheke ezinye izindlela ezisemthethweni zokuncintisana.
Sibike ngalesi sigameko nje, sisanda kubika futhi ngemibukiso yosomabhizinisi, ebihlelwe wuMasipala weTheku, ebisemalokishini eMlaza naKwaMashu.
Osomabhizinisi emalokishini nasemakhaya abazisebenzise izinhlaka nezigcawu ezinjengalezi ukuzama ukusombulula izinselelo ababhekana nazo emabhizinisini baphinde bazihlomise ngazo.
Zikhona nezinye izinto okukhalwa ngazo kwabokufika ezihambisana nobugebengu okudingeka ukuthi nohulumeni aqinise imithetho elawula ukungena kwabantu eNingizimu Afrika.