IZINKONDLO
Ngisho kuwe Zwide omkhulu, Ingani bengizulazula ngiyobayoba,
Ingani bengisesiqakaqakeni kuso isiqhingi, Kukude phambili kukude emuva, Ngeswele umtakuli, ngeswele umhlengi,
Ukuba nami ngiphonse esivivaneni.
Ngimmemezile ufalaza ngicobelela,
Ngayiphuma inqina njengomzingeli. Konke kwaphenduka ize leze Lapho inqina kungekamabuyaze,
Nalapho ngibuya ngilambatha.
Ngaphokophela ngifuna impumelelo,
Izindlebe zakho zakuzwa ukukhala kwami,
Zangawela phansi izinyembezi zami
Lapho ungikhiphela emgodleni wakho, Ungicathulisa ngitotoba kuhle kosana, Ungangazi ungakaze ungizwe nangendaba.
Ungumanethisel’ amachefe abe zingqatho,
Ungumashubis’ iminkantsha yezimfundamakhwela,
Ungumaqinis’ abamnkantshimhlophe ibe bomvu,
Ungumabizw’ asabel’ okwempaka yomthakathi,
Ungumasukela phezulu okwendiza yamasotsha,
Ungumakhathalel’ ukutakul’ isizwe esinsundu. Namuhla ngiyankondloza nginguSonkondlokazi, Ungibonisile imithombo eyiyo, Ngaphuza amtoti amandambi emthonjeni,
Yageleza njalo imisele emthonjeni,
Yaze yafinyelela kolumaphikophiko uKhozi,
Kuzo izandla zikaDonga likaMavuso. Ayaze yama ukugeleza imisele, Yaze yafinyelela kubo abashicileli.
Niyadela zintaba nani mathafa aseNgoje,
Nina enalibona lihluma leli khiwane.
Ngitsheleni iyini imfihlo yenu,
Alibuni leli khiwane elihlale lilihle.
Angikushiyi ngaphandle nawe Nkamana, Wabhema wakholwa ngemisebenzi kaZwide.
Nakuba bethi umuntu ubongwa esefile,
Ngingedlale ngeqiniso engiligodlile,
Ngiyekeleni ngimusho edl’ anhlamvana, Uyiqhawe Zwide mhlobo wami, Ngisho kuwe Sothondoze, Ngisho kuwe Mawewe. Mana njalo nendlu yakho, ngamabhuku!
Nompumelelo Khumalo KWAMUHLE Ngiyesaba ukubiza igama lakho, Hleze ngithunuke abaningi abedlula kuwe. Usijivazile isithunzi somuntu omnyama Uhlangene nombilakhahlela eMgungundlovu. Uncishe amadoda amathuba okuqhwandela imindeni yawo.
Usebenzise indlu emnyama ukujivazana yodwa uhlangene noZinti. Izimpilo zabantu uzilawule
Ngepheshana elincane ‘isipesheli’,
Wenze iTheku laba yizulu lasemhlabeni Abantu kuhle kwezinkomo ediphini. Uhlangane noPort Natal nakha umbimbi NamaBlack Jack angenela abantu emizini yabo Belele eChesterville naseLamontville Ababala njengezinkomo. Uxoshe abantu eThekwini kwangaba ndabazalutho. Wehlukanise phakathi imindeni, Wadala amaDurbanites, Amazimtiti eTheku Abanye wabakhomba ezabalweni. Abantu baseMkhumbane kwaKito ITheku bebelikhomba eduze, Ungabaniki izipesheli.
Ubathele ngoyaba lwama Black Jack namaphoyisa bagcwala umeleko. Ukhahlele isishimiyana sabo, Wachitha imfulamfula yabo nomaconsana wabo. Ukhweze uZinti emakhanda amadoda ewadipha ngoshibhoshi, Uphendule abantu izinyamazane, AmaBlack Jack angamaphisi, Abantu bagcwala izinkalo bezingelwa njengonogwaja, Namavondwe nezimpunzi. Uvulele umhozo, ijuba, Kanti usuthena abanumzane bemizi. Ngiyakwesaba Muhle! Namanje usami uthe qekelele, Ongalubonanga unya lwakho usekubona usuyinyuziyemu,
Ukhangisa ngokungcola kwakho.
Kodwa akusenani, Akugcinanga wena njengoba usuwasala uligobongo, Nebhubesi eselingumqwayiba ongadliwa muntu. Nhlakanipho Zulu