Ayibhekwe kabusha eyeNgonyama Trust
MHLELI: Ngithi angiphawule ngodaba oseluvezwa ngamanye amakhosi athi awayeseki iNgonyama Trust. Vele ayengekho isungulwa.
Iqiniso lithi kwaba yinkosi ewumshana wakwaZulu ngokwesibongo eyabahlelela bodwa kwaZulu ezinye izizwe zangaziswa ngaleso sinqumo nenzuzo ezohambisana naso.
Ngisho sekwadlula isimo esasiphuthuma sika-1994, esenza uMntwana wakwaPhindangene athathe isinqumo noDe Klerk akakaze abuyele emakhosini oselwa amaningi ayekhona emakhulu.
Ayezibusela ezindaweni zawo ngokukhululeka ngemigomo yawo. Ezinye zalezo zizwe zazinezingonyama zazo kephake manje singathini ipolitiki yaKwaZulu-Natal ijulile isuka kude nabashana bahlelela ikomalume kuphela.
Lilonke nami ngokwazi umlando nokuhlonipha amanye amakhosi omdabu ayekhona kudala endulo bengizocebisa ngokuthi ike icutshungulwe kabusha le yeNgonyama Trust okuvela ukuthi osomabhizinisi lapha eKZN abasebenzisa izindawo ezingaphansi kwayo bakhokha uR90 million ngonyaka oya eSilweni esiphinde sihole ngaphezu kuka R64 million ngonyaka kuhulumeni.
Angilungise lapha futhi uMnuz Mncwabe weNFP oke wabhala ngesonto eledlulile uthe iNgonyama Trust yayikhona kudala kusabusa nezingonyama uSenzangakhona noJama. Cha Mhlonishwa wepolitiki kuwuhubhu kabhejane lokho oSenzangakhona abakaze baba yizingonyama. Babengamakhosi nje futhi ubukhosi obabubuncane bukhonza KwaMthethwa, ngakhoke asingafaki imfundisoze. Ubungonyama buqale ngeLembe leli lakwaMhlongo uma siqondisa isiNtu ngoba phela akagcagcanga unina uNandi yingakho abakwaMhlongo besafuna ilobolo labo.
Sengisonga ngiphakamisa ukuthi eyeNgonyama Trust ihlaziywe ngoba amakhosi awazange ahlanganyele isungulwa ukuze ixhaswe. Asingalokhu sifunda emaphephandabeni sekuthiwa iSilo sesizonika abantu abakhele amakhosi amatayitela ekubeni amakhosi engabanga yingxenye yaleso sinqumo. Okhathazekile