Impumelelo ilandele ubunzima kumlingisi
INYANGA ezothwasa ngempelasonto ezayo, uSepthemba, ibizwa ngeNyanga yamaGugu. Kusingathwa imicimbi yesintu njengoMkhosi woMhlanga futhi kube neholidi ngoSepthemba 24. Okusuke kuqhakanjiswa kakhulu wukuthi abantu bazigqaje ngemvelaphi yabo. Omunye umuntu oziqhenyayo ngokuba ngowaseNingizimu Afrika wumlingisi, uTiisetso Thoka (30). Lo mlingisi uzalelwe eLimpopo kodwa wabuye wahlala eMpumalanga njengoba esezinze eGoli. “Ukuhlala kwami kuzona zonke lezi zindawo yikho okwangenza ngakwazi ukukhuluma izilimi eziyisishiyagalolunye zaseNingizimu Afrika. Ngiyawathanda amasiko ahlukene futhi ngihlala ngifunda ngawo. EGoli ngifike ngahlala namaKhaladi, amaZulu, amaXhosa nabanye kanti eLimpopo bengihlala namaVenda namaShangane. Kubalulekile ukuthi sifunde ngobuthina ngaphambi kwezinye izizwe. Kumanje ngizama isiNgisi saseNigeria nesiPutukezi kancane,” kusho uTiisetso.
Le nsizwa izichaza njengomuntu okhululekile, othanda abantu, ukukhuluma futhi nokuhleka. Uthe ukulingisa ukuqale esakhula enza imidlalo yeshashalazi nasesikoleni.
“Ngo-2004 sengiseGoli ngihlangane noSpinach (Thulani Didi) weZone 14 senza nabo imidlalo yeshashalazi,” kusho yena.
Ngaphambi kokulingisa ube wumethuli wezinhlelo kwiYoTV .
Uke walingisa emidlalweni efana neGold Diggers, eKasi: Our Stories, Skeem Saam neminye. Kumanje ulingisa emidlalweni yakuMzansi Magic Isithembiso lapho edlala khona indawo ka-Ali nakwiThe Herd alingisa kuyo indawo kaDingaan.
Uthe ukudlala indawo kaDingaan, ongasakhulumi, inzima kakhulu. “Okunzima ngokulingisa yindlela okumele ukhombise ngayo ukuthi uzizwa kanjani. Ngiyayithanda kodwa indawo engiyidlalayo.”
Uveze ukuthi akubanga lula ukufinyelela lapho ekhona manje ngoba ubehambela izinhlolokhono kungahlangani.
“Kungithathe iminyaka engaphezulu kwengu-10. Bengingatholi ngisho inkampani ezokwengamela umsebenzi wami ngoba bethi anginalo ithalente. Akumele uphonse ithawula uma ufuna ukufeza iphupho.”
Lo mlingisi ungowesibili ezinganeni eziyisithupha. Abazali bakhe basaphila, uyise usethathe umhlalaphansi ebuthisheni kanti unina uyiphoyisa lomgwaqo.
Ngaphandle kokulingisa uphinde asebenze kwiSibaya njengomhleli wamavideo.
Uke waba yimenenja yabaculi abafana noMshoza, Mono T noDJ Mickz.
Uthanda ukubuka ibhola ikakhulukazi amaqembu awalandelayo iKaizer Chiefs neManchester United.