IMalini ifuna ukusabalalela emazweni ase-Afrika manje
SELIFUNA ukungenisa emazweni angaphandle kwaseNingizimu Afrika iqembu le-Afro Pop eselineminyaka likhona, iMalini.
Leli qembu libunjwe nguMdu Ntombela noToffo Goge. Imalini, ezakhele udumo ngezingoma okubalwa kuzo Ucingo, Balele, Jikelele nezinye, likhiphe ingoma entsha ethi Malay’sha epike kuyo umculi we-kwaito uProfessor nowaseZimbabwe uLyonel.
“Ngokusebenza kwethu nomculi wangaphandle yingoba sivula amaphiko, siyasabalala. Asifuni ukuba ngaphakathi
kwemingcele yaseNingizimu Afrika kuphela kodwa sifuna basijwayele nangaphandle. ESwazini bayasazi manje sifuna basijwayele naseZimbabwe. Okuhle ngeZimbabwe wukuthi bayabazi nabahleli bemicimbi bakwamanye amazwe, kuzoba lula,” kusho uMdu. Uthe le ngoma izoba kwi-albhamu yabo entsha ethi Injabulo asebeqedile ukuyenza. “Siyiqambe ngokuthi yinjabulo ngoba sijabule ngendlela eyenzeke ngayo. UProfessor wathi uyakholelwa kithi wathi asisebenzise istudiyo sakhe siqophe ungaze ufe umculo weMalini. Manje i-albhamu isiphelile, iProper Files (inkampani kaProfessor abaqopha kuyo) isingamemezela noma yinini ukuthi iphuma nini,” kuchaza uMdu. Bazokhipha le albhamu nje, selokhu bagcina ngo-2012 nge-albhamu ethi Balele. Ngonyaka odlule bakhiphe ingoma ethi Baby Yo. “Uma uya estudiyo kumele uye uzilungiselele kahle. Thina besingekho isidingo sokuxhamazela ngoba umculo wethu awusheshe uphuphe. Siwunika isikhathi ukuthi ungene kubantu ngaphambi kokwenza enye i-albhamu.”