Wanelisekile ngasekufunde kowengqephu
KUSHO lukhulu kuye ukufinyelela kulesi sigaba asekuso ohlelweni lwemfashini, iProject Runway, uSandile Mlambo (39), wakwaSomkhele eMtubatuba. USandile usethimbeni labayisithupha abasele kulolu hlelo. Selokhu lwaqala umsebenzi wakhe awukhombisayo uwahlaba umxhwele amajaji. USandile ekhuluma neSolezwe uthe, uthando lwemfashini lwaqala kudala esafunda eNatal Technikon, esiyaziwa ngeDUT. “Ngangijwayele ukuthunga amabhulukwe ngesandla ngiwaqede futhi abe mahle. Ngaya ekhaya ngiqeda ukufunda ngafike ngaqhubeka nokuthunga. Umama wabona kodwa wangayikholwa into engangiyenza wagcina ngokunginika umshini wakhe wathi ngiwusebenzise,” kuchaza uSandile. Uthe lo mshini wahamba nawo amadolobha ahlukene amakhulu kuleli ayehlala kuwo ewusebenzisa. “Ngaze ngavula indawo yami ngiwusebenzisa. Baqala ukungazi abantu bafuna ukuthi ngibathungele ngenxa yokuthi igama ngase ngizakhelile. Ngo-2005, ngathola indawo engangisebenzela kuyo futhi ngakhangisa ngezimpahla zami emicimbini okukhona kuyo iSA Fashion Week, Fashion on the Sea neminye imicimbi kuleli,” kuchaza yena.
Uthe into emenze wangenela iProject Runway, ukuzethemba akade enakho.
“Ukungawini kwami kulolu hlelo ngeke kungiphathe kabi njengoba sengenze okuningi kulo, abantu bawubona umsebenzi wami. Ziningi izinto engizifundile njengoba kukhona izinto esizisebenzisayo ebengingazazi kodwa ngafike ngazithola kulo. Izinhlelo ezifana nalolu, ziyasiza kakhulu futhi ngiyanxusa ukuthi ziqhubeke ngoba zingafeza amaphupho abaningi,” kuchaza uSandile.
Uthe uyaziqhenya ngezinto asezenzile empilweni ezithinta imfashini futhi akasabheki emuva, usebheke phambili ekutheni akhule.
Osaziwayo aseke wabagqokisa uSandile uthe kukhona uZonke Dikana, Cici, Kuli Roberts, Thuso Mbedu noLinda Mtoba.