Asiyikhethi imidlalo – Solinas
UCHITHA eyokukhetha imidlalo kwabadlali bakhe umqeqeshi weKaizer Chiefs, uGiovanni Solinas, ongakawini nowokubika umdlalo we-Absa Premiership kusukela efikile eNaturena.
Amakhosi aqale isizini ngendlela ethembisayo edlala ngokulingana neMamelodi Sundowns emdlalweni weligi. Lokhu kulandelwe wukushaya into ecokeme koweMTN8 ekhipha iFree State Stars ngo 3-0.
Nokho kuhlakazeke konke ngesikhathi iChiefs ibuyiselwa kwamhlaba yiBidvest Wits, iyithela ngehlazo lika 3-1 eFNB Stadium emasontweni edlule. IChiefs ishayane yaze yabukana neBaroka FC emdlalweni ophele ngo 1-1, yaphinde yahluleka wukubuya namaphuzu eMgungundlovu ngesikhathi idlala ngokulingana ngo 0-0 neMaritzburg United.
Indlela iChiefs edlale ngayo koweMTN 8 neyeligi ishiye imibizo kwabaningi ngokukhetha imidlalo kwabadlali beChiefs abanengcindezi yokuwina indebe emuva kwamasizini amathathu esomiso. Ngaphandle kwalokho iMTN 8 iyindlela esheshayo yokwenza imali nokubuyisa ukwethenjwa ngabalandeli.
Amakhosi azobhekana neSuperSport United kowomlenze wokuqala wowandulela owamanqamu weMTN8 eLucas Moripe Stadium, ePitoli, ngeSonto ngo-3 ntambama.
“KwiChiefs asiyikhethi imidlalo, sizama ukuwina yonke imidlalo esiyidlalayo. Akwenzeki siqoke ukuthi sifuna ukuwina muphi, siyeke muphi. KwiChiefs sihlale silungiselela ukuwina. Yikusasa lami nabadlali kwiChiefs,” kusho uSolinas.
“Sizobhekana neqembu elinzima iSuperSport, elinabadlali abasezingeni eliphezulu nomqeqeshi oseqophelweni. Ngiyazi ukuthi umdlalo unemilenze emibili kodwa ngeke sikunake lokho. Sizosebenzela ukuwina yomibili imidlalo. Lo mdlalo siwuthatha njengonemizuzu engu-180. ISuperSport ihlule i-Orlando Pirates, AmaZulu neWits. Iyiqembu elinzima. Kodwa angesabi, ngiyabethemba abadlali bami.”
NgoLwesithathu iChiefs isayinise uLebogang Manyama obekade edlala eTurkey, noMario Booysen ogawulwe yizembe ne-Ajax Cape Town. Ngaphandle kwalokho kuvele izindaba zokuthi uSiphiwe Tshabalala noBernard Parker basendleleni ephumayo eNaturena. UTshabalala kuvela ukuthi ufunwa yi-Erzurumspor yaseTurkey futhi iChiefs kuthiwa isivumile ukumdedela.
“Angithandi ukukhuluma indaba yabadlali abahambayo nabafunwa yiqembu. UTshabalala noParker bajimile neqembu ekuseni. Okwami wukuqeqesha abadlali abakhona eqenjini. Uma nabo besekhona ngizobaqeqesha,” kusho uSolinas.
“ULebo ungumdlali osezingeni eliphezulu, uzosisiza kakhulu ekushayeni amagoli. Sinabo abadlali abafana noKhama (Billiat), Castro (Leornado), Moon (Ryan) noParker kodwa uLebo uzokwengenza ekuhlaseleni ukuze sithole amagoli. Emdlalweni wangeSonto ngeke adlale ngoba akakabi qatha ngokwanele. Uma eselungile,uzosisiza sithole imiphumela.”
Umqeqeshi weSuperSport, uKaitano Tembo,uthe uzimisele ngokuvikela indebe yeMTN 8. UTembo ubekade eyiphini likaStuart Baxter ngesizini edlule ngesikhathi beyiwina behlula iCape Town City kowamanqamu.
“Bengikhona eqenjini eliyiwinile ngesizini edlule. Nginengcindezi yokuyigcina eqenjini. Umehluko ukuthi ngaleso sikhathi bengiyiphini kodwa izinqumo bezithathwa ngokuhlanganyela. Kufanele siyivikele indebe,bese sigxila kwiligi. Imidlalo emibili edlule isinike ukuzethemba kakhulu kodwa ngeke sikhohlwe wukuthi sidlala neqembu elikhulu iChiefs, siyazi ukuthi kuzoba nzima,” kusho uTembo.