I-Megane R.S ishaya ngenjini entsha
NGAPHANDLE kokulokhu sithemeleza sikhuluma ngezinto ezingathi shu noma okumele ngabe sigcina ngazo, asivele sihlale endabeni ofuna ukuyizwa, amandla enjini ngoba phela lena yiMegane yejubane.
IMegane R.S ishaya ngenjini entsha engu1.8 litre eneturbo efuqa amandla angu-205 kW netorque engu-390 Nm. Lokhu kuyenza ikwazi ukusuka ku-0 iye ku-100km/h ngemizuzwana engu-5.8.
Ugearbox wayo unamagiya ayisithupha futhi uyashintshwa kodwa kulabo abafuna umshini ozishintshayo kukhona i-EDC nayo enamagiya ayisithupha. Uma uthanda uyakwazi ukuzishintshela wena kumapaddle shift ngemuva kwesiteringi.
IMegane entsha ihlukene ngezinhlobo ezimbili okuyiCUP Manual okuyiyo eshintshwayo neLUX EDC ezishintshayo.
Indlela ebukeka ngayo kuyacaca ukuthi akusiyo iMegane eyejwayelekile ngoba yona isporty kakhulu. Bayenze yakhasa phansi ngo-5 mm uma uyiqhathanisa neMegane GT futhi yona ithe ukuba banzi kancane. Amasondo ayo anamarimu aphakathi kuka-18 (kwiLUX) no-19 inch (kwiCUP) futhi kulunguza ama Brembo brake callipers abomvu kwiCUP.
Ngaphambili ishaya nge air-intake evulekile futhi inamaLED lights ami njengoC njengezinye izimoto zakwabo kanjalo namfog lights amise okukaC ngezansi. Ngemuva ishaya ngenqawe enkulu phakathi nendawo ekhipha umsindo wodumo othi “vrrrr pha” bese ibe ne-diffuser. Okunye okwengeza ubuhle bayo yimibala egqamile emzimbeni okungosawolintshi uTonic Orange nophuzi uSirius Yellow. Sigudla edolobheni ePort Elizabeth ibiwadonsa amehlo.
Uma ungena ngaphakathi uhlala kumaAlcantara Sports seats ngaphambli bese kugima izitishi ezibomvu. Ngemuva abantu ababili bahlala ngokukhululeka yize nowesithathu engena.
Kwicentre console kukhona iR-Link 2 touchscreen tablet engu-8.7 inch okiyilapho uthola khona ezokungcebeleka futhi inezipikha ezigqomayo zeBose. Uxhuma iselula ngeBluetooth kuvele isimo semoto nendlela oshayela ngayo kuphind ekuvele nenkombandlela.
Emgwaqeni le moto ishayelwa ngezindlela ezahlukene njengoba uyikhetha wena ngokuyifaka kuComfort noma uNormal, Sport noma kuRace. KuComfort isuke ihamba kahle ithule nokuthi uma uyifaka kuSport iqale nenjini idumele phezulu futhi nenqawe ithi ukubhonga. KuRace amandla iwakhipha wonke.
Abakugqamisayo yi4CONTROL system eyenza ukuthi asondo angemuva ajike aphambane nawangaphambili ngo-2.7 degrees uma imoto ihamba ngejubane elingaphansi kuka-60km/h. Uma isigijima kakhulu onke amasondo ajikela endaweni eyodwa.
Ushesi utholakala ngezinhlobo ezimbili okuyiSport neCup. Lona weSport wenza ukuthi ibe ntofontofo ngisho ngabe umgwaqo uyabheda kanti oweCup wona uqinile mbijana okusiza indlela ebambelela ngayo emgwaqeni. iqhubeka ekhasini 4