Sidinga imbokodo kowezidudla
IYAKHULEKA intandane yale ngosi kwelakho lodumo lokuwela umfula ugcwele, sithi sivumeleni sichezukele lapho kuphephe khona bese sivula amahazard ethu.
Sivumeleni sicele ukuthi ukuthi sonke siqhubeke nokukhanyisa ama-hazard ethu ngesikhathi sisaququda lempande esayishiyelwa zingqalabutho.
Emasontweni ambalwa edlule sifunde ngokwethulwa komdlalo wokushaywa kwezidudla ngezimoto iMsinga Driftkhana oba seMphelankani, eMsinga, ngaseGreytown maphakathi nalesi sifundazwe. Ngokombiko weSolezwe, owalo nyaka umdlalo uzoba ngasekupheleni kukaSepthemba kusukela mhla ka-21 kuya ku-23.
Lo mdlalo ugqugquzelwa uMnuz Smanga Mabaso ongusomabhizinisi ozimele kuleya ndawo ephakathi koMdlovane nePomeroy. Kulo nyaka kuzobe kuwumgidi wesikhombisa kanti uheha abadlali bezimoto abasuka kulo lonke leli zwe. Kukhona abasuka eKapa, eGoli kwesika Magesh “King of Spin” Ndaba, eMpumalanga, Free State bese kuba abendawo abasuka kuso sonke isifundazwe iKwaZuluNatal. Into eye isigeze igilo ukuthi iminyaka engaka selokhu kwaqala lo mdlalo kuleya ndawo akukaze kwaba nesigigaba sokulimala kwabantu eMphelankani. Kodwa lokho akusho ukuthi akwenzeki izimoto ziphaphalaze zishayise noma zephukelwe yizinjini kuqhume amasondo kuye le nale.
Isizathu esenza ukuthi sicabange ukukhuluma ngalo mdlalo waseMsinga ukuthi basashoda abashayeli besifazane kulo mkhakha wokushaywa kwezidudla. Yebo bakhona abake bathi gqwagqwa kodwa akubi abantu abamnyama ngqo, ekubeni lo mdlalo wande ngabantu abamnyama ababukelayo nawudlalayo. Iminyaka eminingi uma ngifika kuwona lo mdlalo ngiye ngiqaphele ukuthi imbokodo iyashoda ekushayeni izidudla kodwa iba ningi ngasezibukelini.
Kulo nyaka ngiphonsela uMabaso inselelo yokuthi aqale aqeqeshe ithimba labashayi besidudla besifazane ukuze sibabone ukuthi bangelikhuphule yini izinga lalo mdlalo nelesithunzi sesibhuda uma kuziwa ekushayeleni. Ngiyazi ukuthi kunemishwalense ekholelwa ukuthi abantu besifazane abanaso isibindi sokuqhwishisa imoto kunuke imbadada.
Ngokunjalo iningi labantu besilisa abakholwa ukuthi kunabashayeli besifazane abasiboniswa kangcono isiteringi kunabo. Yingakho ngithi mfo kaMtungwa ngicela ke nihehe imbokodo ukuthi ingene kulo mdlalo ingagcini ngokuba yizibukeli nabeseki bamadoda kuphela. Nakubaxhasi abafana noBMW SMG Durban kwesika Mnuz Mongezi Tembe, ngithi ake bakhe kwenye imbiza. Thina singama hazard siyakholwa ukuthi lingaphakama kakhulu izinga uma kungangena imbokodo kulo mdlalo.
Phela sonke siyazi ukuthi lapho kunembokodo khona amadoda awamenywa kodwa angena njengoThukela lungenisa. Mhlawumbe ungathuka usuthola nabaxhasi abalandela imbokodo kulo mdlalo wokushaywa kwezidudla. Ngiyazi ukuthi izinga selikwenye indawo njengoba kulo nyaka kuzobe kudlisa ubukhazikhazi beBMW M4 nezinye eziphambili kodwa nalapho banikeni abesifazane isiteringi, musani ukuqwaha naso.
Akukhona ukuthi ngiyazincengela kubona kodwa ngifuna ukubona uqhude manikiniki ongachemile nobulili obubodwa. Nani-ke mbokodo thathani indawo, musani ukulibala ukukikiza nichwaze nihlokomele obhuti benu engabe niyazibambela. Njengoba abanye sebengenile endimeni yokugibela izithuthuthu zejubane nalana ningangena khaxa.
Ngokwethu sithi asishaye “i-operation gudluz’indoda” sibone ukuthi iyozala nkomoni ukuze ningagcini ngokuduma ngokuba yizihlwele nokushaya izidudla ngokwesula emsebenzini kuphela. Niyabesaba na?!
Hhayi-ke asethembe ukuthi kulo nyaka kuzoqopheka umlando uMsinga Driftkhana ushaya ngomgqiqgo othi “operation gudluz’indoda”.
Kodwa-ke sikhumbule ukuthi isidudla asishaywa emgwaqweni womphakathi masiqhubeke nokushayela ngokubuswa nokulandela yonke imithetho yezokushayela ebusa leli zwe ukuze sihlangane sisaphilile eMsinga. Kunganjalo ungaxoxa nathi ekhasini lika Facebook elithi Igedlela Lami with Sthembiso Shangase. Yimi owenu nali ikheli ngezansi hazardiso@gmail.com