Kume ukufunda bejuqwa yizisu
KUPHAZAMISEKE ukufunda esikoleni eGolozela Secondary eNkandla abafundi bejuqwa yizisu abanye bequleka emva kokuthola ukuthi baphuze ijusi besemcimbini obuhlelwe yisikole.
Kuthiwa bangu-80 abafundi abasizwe uMnyango wezeMpilo KwaZulu-Natal abanye bangeniswa esibhedlela izolo.
Ngokuthola kweSolezwe abafundi bebephalaza abanye bequleka. Iningi labafundi lelashelwe esikoleni ngaphambi kokudluliselwa esibhedlela.
Kunezinsolo eziqinile zokuthi baphuze ijusi ebisiphelelwe yisikhathi emcimbini obungeSonto.
Osondelene nalolu daba kodwa ongathandanga ukudalulwa, ekhuluma neSolezwe izolo uthe izingane zizitike ngokudla nejusi emcimbini ngeSonto kodwa zixinwe ukugula izolo sezifike esikoleni. Uthe indlela obekwenzeka ngayo bekungeke kusaqhubeka ukufunda ngoba bebekhala ngezisu abanye bephalaza. Okhulumela uMnyango wezeMpilo KwaZulu-Natal, uNksz Ncumisa Mafunda, uthe: “Umnyango ungakuqinisekisa ukuthi isibhedlela saseKhombe sisize abafundi baseGolozela High abawu-80 namalungu omphakathi amathathu abebegula. Bonke bebesemcimbini obusePholela ngeSonto wokuqwashisa ngengozi yokujola no-sugar daddy nama-blesser nokuba noBen 10.
Emva kokubona ubucayi besimo namhlanje ekuseni (izolo), abaphathi besibhedlela, ngokubambisana nabaphethe kwezempilo eKing Cetshwayo, bajube amathimba emitholampilo engomahamba nendlwana ukuze aye esikoleni abebegula belashwa bafakwa ama-driphu base bephuthunyiswa esibhedlela.”
UMnyango wezeMpilo uthe abagulayo bayelashwa futhi bayelulama.
Okhulumela uMnyango wezeMfundo esifundazweni, uMnuz Scelo Khuzwayo, uthe basazophenya ukuthi yini egulise abafundi nokuthi isimo sokufunda sibuyela kanjani kwesijwayelekile.
“Sizoqala uphenyo ukuze kutholakale ukuthi yini egulise abafundi. Kube umshophi impela ukuthi abafundi abangaka bagule kuphazamiseke ukufunda kwazise bekumele bathole usizo lwezempilo. Ukufunda kuzobuyela esimeni esijwayelekile maduze,” kusho uKhuzwayo.
Imizamo yeSolezwe yokuthola isigungu esilawula isikole ukuze siphawule ngalolu daba ayizange iphumelele izolo ngoba izinombolo zabo azitholakalanga.
Izolo ntambama Isolezwe lithole ukuthi abafundi abangu-30 bebesalaliswe esibhedlela.