‘Ushintsho kuMthethosisekelo akumele lusabise abatshalimali’
ezophela kusasa, eThekwini.
UNkk Kubayi-Ngubane uthe imithetho yaphambilini beyibhekelela idlanzana, okwenziwayo manje njengoba kuchitshiyelwa umthetho ukuvulela ukuthi bonke abantu baseNingizimu Afrika babeke uvo lwabo.
“Asikho isidingo sokuthi lolu daba luze lubikelwe abatshalimali lwenziwe ihaba kube sengathi kukhona okungekho emthethweni okwenziwayo. Lolu daba lusingethwe yiPhalamende ngoba lusemthethweni futhi akekho umlimi ozophucwa umhlaba wakhe ngokungemthetho,” kusho yena.
UNkk Kubayi-Ngubane usho lokhu ngemuva kokubuzwa ukuthi ngabe ukungasukumi kahle kohlelo lokukhiqiza kusetshenziswa i-biotechnology kuleli ngabe kwenziwa ukuthi abatshalimali bamanqikanqika yini ikakhulukazi emkhakheni wezolimo.
UMnuz Nhlanhla Sibisi weBio Africa uthe ngokubona kwakhe iNingizimu Afrika yenza kahle kulo mkhakha uma kubhekwa ukuthi iqalwe ukusetshenziswa eminyakeni engu-30 eyedlule.
“Akumele siziqhathanise namazwe aseneminyaka engaphezulu kuka-100 esebenzisa i-biotechnology. Ngokwezinga lethu senza kahle. Umkhakha wezolimo unezinhlanga ezehlukene, imbewu ekhiqizwe e-laboratory, eyaziwa ngegenetically modified (GMO) esiza ukubhekana nesimo sezulu esishintshashintshayo,” kusho uSibisi.
UDkt Jaleh Daie we-Aurora Equity ne-Agfood Tech ese-USA, uthe ngokubona kwakhe uma kungaqiniswa ekufundisweni izingane ngebhizinisi zisezincane, lokhu kungavala igebe elikhona phakathi kosomabhizinisi baseAfrika nase-USA.
Ngasohlangothini lokuthi ngabe yini eyenza abatshalimali babe manqika uthe akulula ukuthi angaphendula ngoba abatshalimali banezizathu ezingefani ngezinqumo abazithathayo.