‘Kulahleka imisebenzi ngenxa yabafuna ukuqashwa ngodli’
UMHOLI weDA KwaZulu-Natal, uMnuz Zwakele Mncwango, ucele amaphoyisa nezinye izinhlaka ezibhekelele ezokuphepha ukuthi zisiqaphe ngeso lokhozi isimo sokuphazanyiswa kwezinkampani ezinkulu ngosonkontileka abafuna umsebenzi ngodli.
UMncwango usho lokhu emuva kokuthi iVumatel okuyinkampani efaka i-broadband (okungamakhebuli enza kube lula ukungena kwi-internet), itshele amakhasimende ayo ukuthi izohoxisa osonkontileka bayo KwaZulu-Natal.
IVumatel itshele amakhasimende ayo ukuthi abasebenzi abafaka i-broadband basatshiswa ngabantu abafuna ukuqashwa ngenkani.
“Sizowumisa umsebenzi KwaZuluNatal ngenxa yokuthi abasebenzi bethu bahlale besatshiswa njalo uma benza umsebenzi wabo. Sizoqhubeka nomsebenzi uma sesibonile ukuthi kuphephile,” kusho isitatimende esithunyelelwe amakhasimende eVumatel.
UMncwango uthe amaphoyisa kufanele angenelele ngoba iVumatel idala amathuba omsebenzi ngokusebenzela KwaZulu-Natal okusho ukuthi uma ihamba nawo azophela.
“Siyakugxeka ukusatshiswa kosonkontileka abasuke besebenza KwaZulu-Natal futhi sifuna amaphoyisa angenelele ukuze kuqedwe lo mkhuba omubi. Abantu baseNingizimu Afrika akufanele babekezelele izigebengu ezivimbela izinkampani ezidala amathuba omsebenzi. Akufanele sibayekelele abantu abawisa umnotho ngoba siyazidinga izinkampani ezizoqasha abantu bakithi,” kusho uMncwango.
Uthe njengoba umnotho waseNingizimu Afrika ungakhuli ngendlela eyamukelekile akufanele kusongwe izandla uma izinkampani zisatshiswa ngabantu abafuna ukuqashwa ngenkani.
“Ngicele umhlangano neVumatel ukuze ngizozama ukuyicela ukuthi ihlale kulesi sifundazwe ngoba asifuni kube nabantu abazophelelwa wumsebenzi,” kusho uMncwango.
Imizamo yokuthola ukuphawula kweVumatel ayiphumelelanga njengoba belungabanjwa ucingo emahhovisi futhi ingawuphendulanga nomyalezo ethunyelelwe wona.