Kuteleke abashayela amaloli athwala izimpahla zakwaSpar
BALAXAZE umsebenzi baqhinqa ngaphandle kwamahhovisi abasebenzi balapho kugcinwa khona izimpahla zakwaSpar ePhoenix, eThekwini, bekhala ngamaholo nangempatho, izolo.
Kusukela ngeSonto abasebenzi abangabashayeli bamaloli ahambisa impahla ezitolo ezehlukene bashiye phansi amaloli bathi ngeke bahambise izimpahla kungakalalelwa abakufunayo.
Isolezwe izolo liye kule ndawo lafica amaloli emile nabasebenzi bemi ngaphandle begqoke imifaniswano yalesi sitolo.
Abasebenzi abakhulume neSolezwe kodwa bacela ukungadalulwa amagama abo ngoba besaba ukuthi bazohlukunyezwa bathe akusebenzeki kule nkampani.
“Kunamasonto amathathu sicela ukuhlangana nabaphathi ukuze sikhulume nabo ngezinto ezingasijabulisi kodwa abavumi bayasiziba. Yikhona sikhethe ukuba siyeke ukusebenza kuze kube bahlangana nathi basilalele. Kusukela ngeSonto asisebenzi,” kusho umsebenzi.
Omunye umsebenzi utshele Isolezwe ukuthi ziningi izinqumo ezenziwa yinkampani abangagculisekile ngazo.
“Okwenzekile sizwe kuthiwa umsebenzi omningi wokuthutha impahla unikezwe izinkampani ezingaphandle ngaphandle kokuba saziswe. Lokhu kwenza unciphe umsebenzi kithina nokwenza silahlekelwe yimali,” kusho omunye umsebenzi.
Ezinye izinto abasebenzi abakhala ngazo yiholo elingagculisi, ukuxoshwa ngaphandle kwezizathu ezizwakalayo nokungaqashwa ngokugcwele kwabanye abasebenzi asebehlale isikhathi eside beyitoho.
Izolo abasebenzi bathe abazimisele ngokubuyela emsebenzini ngaphambi kokuba abaqashi babalalele futhi benze ushintsho.
Kuthintwa okhulumela abakwaSpar ngalezi zikhalo zabasebenzi, uMnuz Peter Deeb onguMqondisi ophikweni lwezokukhangisa kwaSpar eKZN uthe: “Ukusebenza nomkhiqizo okumele ufike kubathengi bethu ngeke kuphazamiseke ngenxa yalesi siteleka esingekho emthethweni.
“Ukumiswa komsebenzi akukho emthethweni futhi akuvumelekile. Manje sibheka lokho ngokulandelela imithetho yabasebenzi nezivumelwano esinazo nezinyunyana. I-Spar KZN izohlangana nabashayeli nababamele namhlanje ntambama (izolo) ngenhloso yokuzama ukuxazulula lesi simo ngokushesha. Ngiyathemba isimo sizobuyela kwesijwayelekile maduze,” kusho uDeeb.