Ubuyela ngezayo osolwa ekufeni kwamaphoyisa
UZOBUYELA ngenyanga ezayo enkantolo umsolwa onamacala amabili okubulala amaphoyisa.
UMnuz Sthembiso Cele (22) uvele enkantolo yaseMbumbulu izolo icala lahlehliselwa uSepthemba 10.
Ummangalelwa, okukholakala ukuthi uyinkabi ebiqotha amaphoyisa, uboshwe ngoMgqibelo eWyebank, ngasePinetown.
Kuleli cala bekusebenza oKlebe eThekwini bebambisene neNational Intervention Unit.
Ngokophenyo lwamaphoyisa olusenziwe, ubhekene namacala okubulala uWarrant Officer Clement Mkhize noWarrant Officer Njabulo Linda.
UMkhize wadutshulwa esekhaya Ezigeni Reserve, eMbumbulu, ngo-Agasti 11 nonyaka. Waphuthunyiswa esibhedlela washonela khona.
ULinda wabulawa ngoJuni ehleli emotweni yakhe eMalukazi kwantshontshwa nesibhamu sakhe somsebenzi. Kwaboshwa oMnuz Siyabonga Mkhize (22), Zwelithini Mkhize (29), Mlungisi Ndlovu (25), noSiyanda Ngcongo (21) ngenyanga edlule ngecala lokumbulala.
Kulindeleke ukuthi laba basolwa noCele bavele enkantolo yaseThekwini ngecala lokubulala uLinda ngoLwesine.
Ngokuthola kweSolezwe uCele uphinde athinteke emacaleni okubulala abantu abathathu kodwa amaphoyisa asaphenyisisa.
Umthombo weSolezwe oyiphoyisa elingagunyaziwe ukukhuluma nabezindaba uthe ukuboshwa kukaCele kwenza bakholwe wukuthi babambe ozobaholela ekutheni bathole ukukhanyiseleka ngamanye amacala okubulala esifundazweni.
Okhulumela oKlebe eKZN, uCaptain Simphiwe Mhlongo, uthe mabili amacala okubulala abhekene nomsolwa, uphenyo lwamaphoyisa lusaqhubeka.
Isolezwe lithole ukuthi amaphoyisa aphenya ukuthi uCele akathinteki yini kwamanye amacala amathathu okubulawa kwabantu eMbumbulu ngoMeyi.