Ubabaze ubuhlaza bezingane
AKAWUVALI umlomo uNgqongqoshe wezeMfundo KwaZulu-Natal, uMnuz Mthandeni Dlungwane, ngokuba luhlaza kwabafundi baseMasakhane High, KwaMakhutha, okusanda kugwagwazana kuso izingane.
Ekhuluma esikoleni okokuqala emuva kokushona kwabafundi ababili ngoMsombuluko odlule, uDlungwane ubabaze ubuluhlaza nokungalawuleki kwabafundi.
Ngesikhathi eyala abafundi, abanye bebekhuluma bevungama. Abanye babange umsindo bejabulela ukubona othisha abawu17 abamisiwe.
“Anizwa. Ukuziphatha kwenu namuhla kuyangikhombisa ukuthi kungani sinalezi zinkinga ezikhona njengamanje. Ngifuna nazi ukuthi asizile ukuzodlala la esikoleni kodwa size ukuzosebenza. Silahlekelwe abafundi bethu,” kusho uDlungwane.
UDlungwane noNgqongqoshe wezokuPhepha eKZN, uMnuz Mxolisi Kaunda, baye esikoleni emuva kokushona kwabafundi ababili, uSihle Mngadi (17) waKwaMthiyane KwaMakhutha obefunda uGrade 11 noMangaliso “So” Mbatha (18) waKwaMakhutha obefunda uGrade 10. Bobabili bashonela emtholampilo emuva kokugwazwa. Kuthiwa impi yayisuswe ukuhlaselwa nokuklajwa komunye umfundi owayephucwe iselula ngabanye abafundi.
UDlungwane uthe akufanele ngabe abafundi baphatha amaselula esikoleni. Uthe isikole sesiphenduke isidleke sezidakamizwa. Uthe usanda kuthumela inhloko yomnyango, uDkt Enock Nzama, kuso wathola ukuthi kunabantu abangena esikoleni basebenzise izidakamizwa uma sesiphumile.
Utshele abafundi, abazali nothisha abebekhona ukuthi kunezinqumo asebezithathile emuva kokuthola umbiko wethimba elalijutshwe ukuthi lizophenya esikoleni ngokumiswa kothisha abawu-17 ekuqaleni konyaka. Kulindeleke ukuthi azimemezele ngoLwesithathu izinqumo ezithathiwe ngothisha namavolontiya akhona esikoleni.
“Ezinye zalezi zinqumo ngeke nize nizithande kodwa kufanele nazi ukuthi zenzelwe ukuletha uzinzo esikoleni,” kusho uDlungwane.
Wexwayise abafundi ngokungena izindaba zemibango ephakathi kothisha.