Bafuna ushwele wabafundi ababelwela imfundo yamahhala
PHEZU kokuba zizibophezele ukuthi zizosebenzisana nehhovisi likaNgqongqoshe wezoBulungiswa uMnuz Michael Masutha izishoshovu ezaziboshelwe ukubhikishela imfundo yamahhala, zifuna uMengameli Cyril Ramaphosa anike bonke abafundi ushwele.
Lezi zishoshovu ezazihola umkhankaso odume nge#FeesMustFall izolo zithe zifuna wonke umfundi owaboshelwa lo mkhankaso athole ushwele.
Izolo uMnuz Bonginkosi Khanyile ongesinye sezishoshovu ezazilwela imfundo yamahhala eThekwini, uthe uzimisele ukusebenzisana noMasutha ukuthola isixazululo ezinkingeni zabo.
“Sizosebenzisana noMasutha singabafundi kodwa sithi umengameli akanike bonke abafundi ababeboshelwe i#FeesMustFall ushwele,” kusho uKhanyile obeqhinqe ezindlini zoMbuso i-Union Buildings ePitoli kusukela ngesonto eledlule.
UKhanyile ukusho lokhu emuva kokuthi uMasutha ethe umnyango wakhe uzolekelela abafundi ababebhikishela imfundo yamahhala kusukela ngo-2015.
UMasutha uthe ziningi izindlela zokuthola ubulungiswa ngaphandle kokuthi abafundi babhadle ejele.
Uthe abafundi bazocelwa ukuthi benze uhlu lozakwabo abavalelwe emajele nalabo ababhekene namacala ngenxa yokumashela imfundo yamahhala.
“Ngizobasiza ukuthi baxoxisane nophiko lwezokushushisa ukuze amacala abo abhekwe kabusha. Sizobasiza ukufaka izicelo zikashwele,” kusho uMasutha.
UKhanyile uthe uma sebeqoqe wonke amagama abafundi bazosebenzisana nehhovisi likaMasutha futhi uyafisa ukuthi ushwele unikwe ngisho abafundi asebaxoshwa ezikhungweni zemfundo ephakeme.