Uyobongwa nini uNandi ngokusizalela iLembe?
SESIYIPHETHA le nyanga ngicela ukukhuluma ngenzalambumbi wesizwe samaZulu, iNdlovukazi uNandi. Abangalithandi leli gama sicela behlele ngenzansi. Umlando awuyi ngentando yomuntu. Kwakumele iNgonyama uShaka izaleke ngendlela eyazaleka ngayo. Wonke amaqhawe azaleka ngaleya ndlela. Buza amaJuda ngoJesu. Buza abeLungu ngoJulius Caesar. NakuNandi akuphuthe nduku ehawini. Nanamhlanje uMariya uyaziswa embusweni nasenkolweni yamaKrestu. Yithina kuphela esingamazisi uNandi njengeNdlovukazi neNzalasizwe.
Ukuba siyamazisa ngabe itshe lakhe lisamile. Siyabonga Solwazi Mathenjwa awusolwazi ngamanga. Sibonga nakuPhili ngokuphakama bazame imizamo yokumisa itshe edlinzeni leNdlovukazi. Kwaqhamuka mlungu thizeni walibhidliza. Lathula izwe. Sathula nesizwe esizalwa yileyo Ndlovukazi.
Le Ndlovukazi yasizalela iqhawe. Yalikhulisa ilibambe ngamazinyo. Yalifundisa ukuphikelela. Leli qhawekazi lawa livuka neLembe laze lahlala esihlalweni sobukhosi. Noma langena ngendlovu iyangena vele lalizaleke kanjalo. Esikubonga kakhulu la umama ongayilahli ingane yakhe. Sibonga umama okhulisa indoda. Bonke abaholi abavelele banawonina abalwayo. Ezibongweni zaleli qhawekazi kunomugqa othi: “UMathanga kawahlangani, ahlangana ngokubona umyeni”. Loku kuchaza ukuphikelela eyayinako le Ndlovukazi.
Kule Ndlovukazi sifunda ukuthi owesifazane kumele abekezele. Kumele avikele izingane zakhe njengesikhukhukazi sikhusela amatshwele aso. Kumele awalwele amalungelo akhe. Namanje le Ndlovukazi ayithandwa ngabaningi. Ize ibe yiqaqa nakwabakubo. Umuntu onjani ozondwa ngisho esaziphumulela? Siyoyibonga nini isizwe le Ndlovukazi ngokusizalela iLembe? Siyosuka nini isiqalekiso phezu kwayo? Siqaphele ukuthi ngaleso sikhathi iNdlovukazi yayiyingane. Ayilalanga yodwa. Kuyoqalekiswa abesifazane abazalele ekhaya kuyoze kube nini?
Ngiyafisa ilungiswe indaba yokuzalela ekhaya. Amantombazane akwenza emancane loku. Sengathi angathi uma esekhulile axolise kubazali. Nabazali kumele balwemukele uxolo lwawo. Uma kunokwenzeka kungachithwa negazi kuxoliswe nakwabalele. Loku kubambelana amagqubu kulimaza isizwe sonke. Nathi siphila ngaphansi kwaleso siqalekiso sokubanjelwa kwale Ndlovukazi igqubu. Sicela abakwaMhlongo bayixolele, lixhoshwa libhekile. Asingeni ezindabeni zakwaMhlongo kepha njengoba kuzalwa iLembe khona siyathinteka. Sicela balubuke ngenye indlela lolu daba. Njengesizwe siyasidinga isibusiso seLembe nesikanina.
Umlando uveza ukuthi iLembe lalimthanda ngaphezu kokwenza unina. Kwasuka esinamathambo ngamsukwane ekhotheme. Kwaziliswa ngisho inja imbala. Mhlawumbe iLembe lingaxola uma kuxolelwa unina. Lalimthanda kufanele. Wawa evuka nalo laze lahlala esihlalweni. Unesandla esikhulu ekubuseni kwalo. Lowo mbuso-ke ungowethu sonke. Singena ngobuZulu obaqanjwa iNgonyama uShaka, izalwa iNdlovukazi uNandi. Ngeke simlahle umama wesizwe. Zimbi izingane ezilahla oninakhulu. Siqalekisiwe isizwe esingabahloniphi okhokho baso. Siqaphele nathi singangeni esiqalekisweni esingenasidingo.
KuyisiZulu esiphelele ukuthi hlonipha uyihlo nonyoko. Inkosi uSenzangakhona neNdlovukazi uNandi badala. Zimbi izingane ezingena zigamanxe ezindabeni zabantu abadala. Inkosi uJesu izalwa emlandweni lapho kwafa khona u-Uriya. Abomndeni wakhe abakaze bambalele ukuthi uzaleka kanjani. Asiyi ndawo uma sisabalela abazali bethu ukuthi basizala kanjani.
Ngiyafisa ukuba sibuyiswe isithunzi seNdlovukazi uNandi. Hhayi kabi, hhayi ngolaka. Ake silubhekisise lolu daba sibone ukuthi asiziqalekisi yini thina ngokuqalekisa iNdlovukazi. Singobani thina ukuthi singaqalekisa abazali bethu? Sizwa kuthiwa itshe elagqebhulwa edlinzeni leNdlovukazi lisekhona ndawo ndawo. Sicela libuyiselwe laphaya edlinzeni. Kuyichilo loku. Akumele ngabe amadlinza amakhosi neziNdlovukazi akulesi simo akusona njengamanje. Ubukhosi bakithi kuphela obunganakiwe. Sicela iNhlangano Amafa, uma isekhona, ilusukumele lolu daba. Leliya litshe lakhiwa ngezimali zethu bakhokhi bentela. Masisukume sakhe. Uma kukhona othumekayo kuloku makazithume alande itshe alibeke lapho lifanele ukuba khona.
Uxolo siyoluthola ngokungena ngezindlovukazi. Yizona ezikwazi ukusondela ezimbubeni zehlise ulaka. Ngiyayithanda indaba kaNakanjani ethi “Kuxolelwa Abanjani?”
UMakhoba umbhali wa-Amagugu Esizwe, Uju Lwezizukulwane. Ikheli lasemoyeni; makhobak@ unizulu.ac.za