Usejoyine elivamise ukudla iz
USENEKHAYA elisha eqenjini elizodlala kwi-Uefa Champions League umdlali wasesiswini weBafana Bafana, uMay Mahlangu, oshiye iDinamo Bucharest wajoyina iLudogorets Razgrad yaseBulgaria lapho ebevele edlala khona.
Osekushintshile wukuthi uMahlangu usezodlalela iqembu elivamise ukudla izicoco hhayi leli abelidlalela elivika izembe minyaka yonke.
Lokhu kuqinisekiswe yibona ompetha baseBulgaria esitatimendeni abasikhiphe ngempelasonto. UMahlangu, okuthi njalo uma ebizwe kwiBafana afike ashaye into ecokeme, akukona okokuqala edlalela iqembu elidla izicoco e-Europe kwazise uqale ukugqama edlalela iHelsingborgs IF yaseSweden adle nayo izicoco ezinhlanu.
Esekulona leli qembu uMahlangu, oneminyaka ewu-29, uke waqokwa njengomdlali ovelele kuleliya lizwe ngo-2011. Ngaphandle kweHelsingborgs, uMahlangu udlalele i-IKF Hassleholm ne-IKF Gotenborg wonke aseSweden ngaphambi kokudlulela eTurkey lapho edlale khona eqenjini elifanayo nebelidlalelwa uLebohang Manyama osanda kusayina kwiKaizer Chiefs.
Uke wadlala naseBelgium kwiSin Truiden lapho ebeqeqeshwa khona uBenni McCarthy engakabuyi ekhaya ezothatha umsebenzi kwiCape Town City. Usuke eBelgium eseya kwiBucuresti lapho iLudogorets imthathe khona. Usedlalele iBafana amahlandla awu-18 washaya amagoli amabili.
“Akaseyena umdlali wethu uMahlangu kepha usengoweLudogorets kusukela namuhla,” sisho kanje isitatimende ngempelasonto.
EFrance iLille, edlalelwa uLebohang Mothiba, izenzele kwaba lula inqoba ngo 3-0 kwiGuingamp edlalelwa uLebohang Phiri wakuleli kodwa obelimele. NoBongani Zungu udlale imizuzu ewu-77 kwi-Amiens ishaywa yiRemy ngo 4-1. Nakuba elimele kodwa iqembu laseGreece ne-Espanyol yaseSpain kuthiwa amfuna uthuli lo mdlali.