Uhlabe ukuzithwala beshaywa ngabakhaya
UDINWA ngakubiza ngokuzithwala kubadlali bakhe umqeqeshi weBaroka FC uWedson Nyirenda.
UNyirenda uveze lokhu ngemuva kokuthi behlulwe abakhaya iPolokwane City ngo 2-0 ngeledlule.
Lona bekuwumdlalo wesibili iBaroka ihlulwa kwi-Absa Premiership. Ivule ngenduku ishaywa AmaZulu FC. Ilandele ngokudedela isibhaxu kwiCape Town City yase idlala ngokulingana neKaizer Chiefs. Ngaleso sikhathi iCity ibisishaywe kuyona yomibili imidlalo yayo, nokuyikhona uNyirenda abona ukuthi kuholele ekutheni abadlali bakhe bafike sebezithwele kowabakhaya.
“Ngicabanga ukuthi abadlali bami bafike nomqondo ongalungile emdlalweni. Bazitshele ukuthi umdlalo sebewunqobile. Ngibayalile ngokuthi uma benikeza laba bantu (iCity) ithuba lokudlala bazosilimaza. Angizange ngikubone ukuzinikela kubadlali bami,” kusho uNyirenda kwiSuperSport.
Uma kukhona into aseyivezile ngaye lo mqeqeshi odabuka eZambia wukuthi akayona indoda esabayo ukuveza imizwa yayo.
Sekube yikabili imidlalo ilandelana enza izinguquko esiwombeni sokuqala somdlalo okuyinto engavamile.
Kuzona zombili lezo zikhawu ayizange ikufihle le ndoda ukuthi umdlali imdonse ngoba ingakuboni abekwenza enkundleni.
UThabo Moseki ube yisisulu salokhu ngesikhathi bedlala neChiefs emdonsela ngaphandle ngemuva kwemizuzu ewu-28.
Emdlalweni weCity uMpho Kgaswane usheshe waphunyuzwa eshintshwa ngomzuzu ka-45.
“Akukho esikubone esenzela khona (uKgaswane). Asikho isidingo sokugcina umdlali enkundleni uma engakuniki lutho,” kusho uNyirenda.
Emdlalweni olandelayo weligi iBaroka izovakashelwa yiHighlands Park ePeter Mokaba Stadium kusasa.
UNyirenda ufuna basebenzise isikhathi abazosihlala bengadlali belungisa indaba yokushaywa kwamagoli.
“Ngicabanga ukuthi siya ngokuhlangana kodwa sisebuthuntu phambi kwamapali. Kumele sisebenze kulokho,” kusho yena. Basashaye amagoli amathathu emidlalweni emine.