USolinas ukhathazwa eyokuvuzisa amagoli
IYAMKHATHAZA eyokuvuzisa amagoli kweqembu lakhe umqeqeshi weKaizer Chiefs, uGiovanni Solinas, nakuba efuna bagxile ebholeni eliya phambili.
IChiefs idlale ngokulingana ngo 2-2 neSuperSport United emdlalweni womlenze wokuqala wowandulela owamanqamu weMTN8 eLucas Moripe Stadium, e-Atteridgeville, ngeSonto ntambama. Amagoli eSuperSport ashaywe uBradley Grobler kwathi aweChiefs avalelwa phakathi uKhama Billiat noLeonardo Castro.
Amakhosi azibeke endaweni enhle yokudlulela kowamanqamu weMTN8 okuyithuba lokuqeda isomiso seminyaka. Iholwa uSolinas, iChiefs isingenelwe ngamagoli ayisikhombisa emidlalweni eyisithupha. Wonke angene kuvimbe u-Itumeleng Khune.
“Ngifuna sidlale ibhola eliya phambili. SiyiKaizer Chiefs, iqembu elikhulu nabalandeli bafuna izindebe. Ngazi indlela eyodwa yokuwina imidlalo nezindebe, kuwukushaya amagoli amaningi kuneqembu osuke ubhekene nalo. Ngifuna sibe mandla ngokuhlasela, sakhe amathuba ngoba sinabadlali abahle phambili. Sidinga ukukhuphula izinga kodwa ngijabule.
“Kodwa kuyiqiniso ukuthi singenelwa ngamagoli. Ngifuna sishaye amagoli kodwa angangeni ngakithi. Singenelwe ngamagoli amabili (koweSuperSport) ngoba besithambe kakhulu emuva, singayigxilisanga imiqondo yethu. Yingakho singenelwe yigoli elisuka ebholeni eliphosiwe. Lesi yisimo esisebenzile kuso ejimini. Siyazi ukuthi baphonsa amabhola amade, salihlanganisa iqhinga lokubhekana nalokho. Kodwa abadlali bahuqe ubuthongo. Kufanele senze kangcono emuva ngoba siyakhohlwa wukuthi uma kwenzeka ibhola lisuka kithina, kudingeke simake,” kusho uSolinas. IChiefs idlale ngaphandle kwensephe uSiphiwe Tshabalala ofunwa yi-Erzurumspor yaseTurkey. Nakuba uSolinas ehlale ezihlangula ngokuphawula ngabadlali abafunwa yiChiefs nabayishiyayo kodwa kuvelile ukuthi bekuwumzamo wokumonga ukuthi angalimali nokungamlahlekiseli ngethuba.
“UTshabalala ungumdlali omuhle, ngiyamthanda. Uqophe umlando kwiChiefs, ufanele ukuhlonishwa. Nami ngiyamhlonipha. Uma uTshabalala ethola ithuba, kungani ngingamvikeli, kungani ngingameseki. Ngiyamthanda uTshabalala futhi ngiyamhlonipha,” kusho uSolinas.
Phezu kokuba iChiefs ishaya into ecokeme kwiMTN 8 kodwa ayikawini nowodwa umdlalo kwi-Absa Premiership kwemine esiyidlalile selokhu kuqale isizini ka-2018/2019. Amakhosi azokwamukela iBloemfontein Celtic eFNB Stadium kusasa ngo-7.30 ebusuku. Kuzoba kungokokuqala umqeqeshi weCeltic, uSteve Komphela, ebuyela eFNB Stadium lapho aphuma khona esejikijelwa ngabalandeli baMakhosi esawaqeqesha ngesizini edlule ngenxa yokuphikwa yimiphumela. KwiCeltic akayazi induku. Usayiwine yomithathu imidlalo selokhu kuqale isizini.
“Kuzoba wumdlalo onzima ngoba iCeltic iqale kahle, yawina imidlalo emithathu ilandelana. Lokhu kusho ukuthi iyiqembu elihle. Ngokwami uSteve ungumqeqeshi olaziyo ibhola. Ngiyamthanda uSteve ngoba uyindoda ehlakaniphile. Ngiyamhlonipha kakhulu. Kwiligi sidinga ukuwina imidlalo ngoba asiqalanga kahle, sidlale ngokulingana kakhulu. Lokho akwanele kwiChiefs ngoba abantu abajabuli. Sidinga ukuwina kwiCeltic,” kusho uSolinas.