OweCity ufisa ukudlala kowamanqamu eMTN 8
ISITOBHA seCape Town City sifuna ukubona iqembu laso lidlala kowamanqamu eMTN 8.
UTareeq Fielies (osesithombeni) ushaye igoli benqoba iMamelodi Sundowns ngo 1-0 eKapa emlenzeni wokuqala emdlalweni owandulela owamanqamu walo mqhudelwano.
Kungenzeka ukuthi uFielies usenesilonda sokuhlulwa yiSuperSport United kowamanqamu weMTN 8 ngesizini edlule. Leli qembu eliphekwa wuBenni McCarthy lashaywa kumaphenathi ngemuva kokuthi umdlalo walo naMatsatsantsa a Pitori uphele ngo 1-1.
UFielies uyazi ukuthi awuphelile umsebenzi wokuphendla indlela ebheke kowamanqamu njengoba besenomlenze wesibili neSundowns ngempelasonto.
Umdlalo useLucas Moripe Stadium ngeSonto ngo-3 ntambama. Uma uphela kulinganwa ngo 1-1 kuzoyiwa kumaphenathi.
“ISundowns isimangazile ngesikwati (sabadlali abangavamile ukudlala) esibophele. Besingasihlelelanga. Kodwa ke nathi singabadlali esigabeni esikhokhelayo bekufanele sibhekane nesimo. Ngijabule ngomphumela. Sesibheke ukuyowuvikela emlenzeni wesibili,” kusho uFielies obekhuluma nabeSS4 ngemuva kokuba ngumdlali ovelele.
Uyakuqonda ukuthi kuzoba nzima uma sebesesibayeni seSundowns.
“ISundowns izobe isekhaya. Kuhlezi kunzima ukudlala phambi kwabalandeli bayo kodwa ke ngiyethemba ukuthi sizokwazi ukudlulela phambili.”
Nokho ngaphambi kwalowo mdlalo, uFielies nozakwabo kuzomele bagxilise imiqondo yabo emdlalweni we-Absa Premiership. Kusasa bavakashela iFree State Stars eGoble Park ngo-7.30 ebusuku.
Kwi-Absa Premiership, iCity isanqobe umdlalo owodwa ihlula iSuperSport United, yashaywa iBaroka FC, yase idlala ngokulingana neLamontville Golden Arrows.
UMcCarthy uthe okumjabulisile ngezakhe emdlalweni neSundowns, wukuthi abazange bangenelwe yigoli nokuthi umsebenzi wokuzicija ngamakhona ubasebenzele.
Igoli abalishayile bekuyikhona evalelwe uFielies ngekhanda.
“Bekubonakala ukuthi igoli liyeza ngenxa yengcindezi ebesiyifaka.Siyicindezele iSundowns yenza amaphutha. Ngijabule ngokuthi ekugcineni ibe nomvuzo imisebenzi esiyenza ejimini ngamakhona,” kusho uMcCarthy.