Ubuyiselwe ngo-elethu uMthembu weSACP
UNOBHALA wamaKhomanisi KwaZuluNatal, uMnuz Themba Mthembu, uthe uyazi ukuthi kukhona abangamfuni ngaphakathi kwiSACP.
UMthembu uthe abangamthandi bafuna ukuthi iSACP iphathwe njengeANC.
“Izinkinga ezikhungethe i-ANC seziqala ukuvumbuka kwiSACP. Kukhona abanye abangangithandi kodwa ngeke abantu bakuthande bonke,” kusho uMthembu.
Ukusho lokhu izolo ekhuluma esithangamini nabezindaba eThekwini ngemuva kokubuyiselwa ngaphandle kokuphikiswa wubuholi besifundazwe engqungqutheleni ebisoPhongolo ngempelasonto.
Umgcinimafa weSACP, uNksz Nomarashiya Caluza, uthe yidlanzana elingamfuni uMthembu ngoba engqungqutheleni wamukelwe ngenhlokomo.
“U-99.9% otshengise ukuthi uyameseka uMthembu. Ngeke abantu bakuthande bonke kukhona abangeke bakuthande siqu sakho,” kusho uNksz Caluza.
USihlalo weSACP, uMnuz James Nxumalo, uthe ababhekile izikhundla njengoba besebenzela abasebenzi.“Okwethu akukhona okwezikhundla ngakho asibhekile ukuthola izikhundla. Sayixoxa sayeseka indaba yokuthi uNkk Nomvuzo Shabalala, owayeyiPhini leMeya yeTheku, ayoba yilungu le-ANC ePhalamende,” kusho uNxumalo. Ubephendula umbuzo wokuthi akazisoli yini njengoba achitha eyokuthi ajutshelwe esiShayamthetho ayomela i-ANC.
Mayelana nokukhishwa kwabaholi esigungwini esiphezulu se-ANC eNasrec ngoDisemba, uMthembu uthe abaneme ngalesi sinqumo wathi kodwa akumele bagxeke i-ANC.
“Kwathina kumele sizinuke amakhwapha singalokhu sigxeka i-ANC. Esifundazweni sinabo abaholi abasesigungwini sesifundazwe se-ANC okubalwa uNkk Nomalungelo Gina, iPhini likaSihlalo weSACP, noSihlalo we-ANC uMnuz Sihle Zikalala uyilungu lethu,” kusho uMthembu.
UNksz Caluza uthe sisekhona isidingo sokuthi iSACP ibekhona wathi izibalo zikhombisa ukuthi ayakhula amalungu abo.UMthembu uthe uyozwa ngamalungu uma esethi asekhathele nguyena bese eyeka.
Uthe kuyehla ukubhekana ngeziqu zamehlo phakathi kwe-ANC neSACP esifundazweni.
UMthembu uthe bayohlezi bemeseka uNobhala jikelele wamaKhomanisi uDkt Blade Nzimande.
Ubalule ukuthi kumele kuvuselelwe uFasimba, uphiko lwentsha lwamaKhomanisi ngoba lubhekene nezinkinga.
Ingqungquthela yeSACP ibithanyelwe amalungu angu-321 abemele amalungu abalelwa ku-74 938.
.