Ubalula izinselelo ezibhekene noweChiefs
KUNINGI okwenzeka kwiKaizer Chiefs okungenzeka ukuthi kunomthelela ekutheni umqeqeshi uGiovanni Solinas kumthathe isikhathi ukuhlanganisa iqembu ngendlela afisa ngayo.
Lona ngumbono ka-Amanda Dlamini ongumhlaziyi kanobhutshuzwayo kwiSuperSport.
Ngaphambi komdlalo wayizolo ebusuku neBloemfontein Celtic, Amakhosi abesanqobe umdlalo owodwa (weMTN 8) ngaphansi kukaSolinas ofike kusele isonto kuqale isizini.
Lokhu kusho ukuthi lo mqeqeshi waseItaly akazange abe nesikhathi sokuhlelela isizini entsha neqembu.
“Ngicabanga ukuthi ziningi izinto abhekene nazo umqeqeshi weChiefs ngaphandle kokwenzeka enkundleni. Kunabadlali abafikayo njengoLebo Manyama, kunoShabba (Siphiwe Tshabalala) ohambayo, kunodaba lokaLorenzo Gordinho okungazeki ukuthi uzobuya noma cha. Zonke lezi zinto zidinga ukuthi wena njengomqeqeshi ufunde ukubhekana nazo zingaphazamisi indlela iqembu elidlala ngayo. Yingakho kuzothatha isikhathi ukuthi iChiefs ifinyelele kulokhu okubhekiwe,” kusho uDlamini.
Nokho kukhona okuhle akubonayo eqenjini likaSolinas selokhu efikile.
“Manje sebedlala amabhola aya phambili. Ukuba khona kukaSiphelele Ntshangase esiswini kusho ukuthi amabhola awasalahleki, awekho amaphasi aya emuva noma emaceleni. UKhama Billiat noLeonardo Castro bayatholana kanjalo noDumisani Zuma. Umqeqeshi usanda kuncoma uKhama ngokuba umdlali osezingeni. Cabanga ukuthi kuzoba njani uma esebe nesikhathi eside ehlale neqembu.”
Ngemuva kwemidlalo yeligi yayizolo, isiyoze ibuye ngoSepthemba 15 ngenxa yekhefu leFifa. UDlamini ukholwa wukuthi lesi sikhathi sizosiza uSolinas ukuhlanganisa iqembu ngendlela afisa ngayo.
“Leli khefu lizosiza kakhulu ngoba abadlali abasha bazothola isikhathi sokufunda isitayela seqembu. Nomqeqeshi uzoba nesikhathi sokusebenza nalo ingekho imidlalo. Ngokwami lokhu esikubonile kwiChiefs kuyizinkomba zokuthi ingaba ngcono,” kusho uDlamini.
Ngaphandle kukaManyama abanye abadlali abasha kwiChiefs, uMario Booysen, no-Andriamirado ‘Dax’ Andrianarimanana. Kuthiwa uDax waseMagadascar usalinde amaphepha amgunyaza ukusebenza kuleli.
Uma kubuywa ekhefini iChiefs izovakashela iCape Town City eKapa ngoSepthemba 15.