UKhune angase abe khona kwiBafana
KWEHLE amaphaphu kubathandi nabalandeli beqembu lesizwe laseNingizimu Afrika, iBafana Bafana, ngesikhathi kuvela ukuthi maningi amathuba okuthi unozinti wokuqina u-Itumeleng Khune abe mdibi munye nozakwabo ekhempini eqala ngeSonto.
Indaba iqale ukwethusa nokusolisa engabonakali enkundleni uKhune emdlalweni omqoka we-Absa Premiership ogcine uphele ngo 2-2 ngesikhathi iKaizer Chiefs ibhekene neBloemfontein Celtic eFNB Stadium, eGoli, ngoLwesithathu.
Indawo kaKhune ibivalwe ngomfana omncane uBruce Bvuma ngoba omunye wonozinti abalandelwe ukuthi bazosiza uKhune, uVirgil Vries, naye unenkinga yokulimala. Ngesikhathi iChiefs ingambopheli uKhune ithe unenkinga engalweni kodwa kusolakala sengathi uhlushwa yihlombe elike lamhlalisa ngesizini edlule.
Nokho iChiefs ikhiphe isitatimende icacisa ngaye lapho iveze khona ukuthi akalimele kakhulu kodwa ibone kungcono ukuthi imphumuze ngoba ingalo yakhe ibivuvukele.
“Bekusemqoka ukuthi singamphoqi uma kukhona akhala ngakho. Maningi amathuba okuthi abonakale kule mpelasonto emdlalweni wethu womlenze wesibili weMTN 8 neSuperSport United,” besibhalwe kanje isitatimende ngoKhune.
Izindaba zizokwehla kamnandi kubalandeli beBafana enomdlalo omqoka wokuhlungela ukuzibekisela indawo kwi-Africa Cup of Nations (Afcon) neLybia eMoses Mabhida Stadium ngoSepthemba 8.
Ukuba khona kukaKhune kubukeka kuzoba nomehluko. Uma engekho eqenjini lesizwe kunokuntenga odongeni kwazise uyayibona ingozi ingakenzeki bese eqwashisa izitobha zakhe.
Lokhu kubonakele nasemdlalweni weChiefs idedela amaphuzu kwiCeltic. Izitobha zeChiefs beziphambana kucaca ukuthi akekho ozikhuzayo azikhombise izinto ezingazinakile njengoba uKhune ehlale enza.
URonwen Williams noDarren Keet ngabanye onozinti uStuart Baxter abaqoke noKhune. EzikaBaxter ziyiqale kahle imidlalo yokuhlunga zenza okungakaze kwenzeke zinqoba ngo 2-0 kwiNigeria ekuhambeni. Uma zingaphumelela ukuqoqa amanye amaphuzu agcwele kwiLybia nephupho lokuba seCameroon ngonyaka ozayo lizokhula.
Isikwati seBafana sizohlangana ngeSonto eGoli ngaphambi kokulibangisa eThekwini lapho sizoqala khona ukuziqeqesha ngoMsombuluko.