Kunogcobho phakathi ukuxosha abaqeqeshi kukaMpengesi
UKULOBA kwami ngonobhutshuzwayo akuchazi nakancane ukuthi sengiwungoti kuwona ngoba angikaze ngiwudlale ezingeni elikhokhelayo. Ngagcina ngikhahlela izidindi nje sisadlala ngebhola eligugile le phansi kwezintaba e-Underberg. Nakhona futhi ngangingemandla okungenzeka kwakubika kona ukuthi ngiyogcina lapha, ngisebenzisa iminwe ‘ukudlala’ unobhutshuzwayo.
Lokhu nje kukodwa kwenza ukuthi ngicwecwe amagama uma kwenzeka ngifikelwa umuzwa wokugxeka umuntu othile ohlangene nonobhutshuzwayo. Phela ngiyazi ukuthi kukhona abawazi ngaphezu kwami njengoba ngiwumcosheli nje, obhala lokho akubonayo nalokho akunikwayo yilabo abawazi kangcono unobhutshuzwayo.
Nokho namuhla ngizoxolisa uma engizokusho kuzolumela ngoba sengihlale isikhathi eside nale ndaba ngingalizwakalisi ilaka lami.
Ezintathakusa izolo ngike ngaphenduphenduka embhedeni, ngazibuza ngaziphendula ukuthi kanti kwakhala nyonini kumphathi weChippa United, uSiviwe “Chippa” Mpengesi. Ngize ngiphaphama kusakhala amaqhude nje ebika ukuthi sekuyasa, yingoba lonke isonto eledlule bengimangele ngemuva kokuthola izindaba ezithi usexoshiwe uDan “Dance” Malesela obecija ezikaMpengesi.
Ngeledlule bengizitshela ukuthi ngizofika etohweni ngizwe ukuthi hhiya bekungamampunge nje abantu bakaFacebook lawo, uMalesela usazohlala kwiChippa. Nokho konke kuqinisekisiwe ngesikhathi leli qembu elizinze eBhayi likhipha isitatimende ebesicacisa ukuthi selihlukene noMalesela izintambo sezizothathwa ngu-Eric Tinkler.
Abathandi bakanobhutshuzwayo baseNingizimu Afrika sekuyinto abayijwayele ukuthi uMpengesi uyabaxosha abaqeqeshi uma iqembu lingawini, kungakhathalekile noma kusuke kukhulunywa ngemidlalo emibili nje vo. Umbuzo esengizibuza wona nje owokuthi, ingabe uyalazi ibhola uMpengesi noma ungene kulona ngephutha nje?
Ngake ngezwa ukuthi lo mbhemu unenkampani yonogada eyenza kahle impela. Ngabe iqembu lakhe lebhola uliphathisa okwale nkampani yakhe yonogada noma yisimo esihlukile? Uma kungukuthi nasenkampanini yakhe yonogagada wenza lokhu akwenza kubaqeqeshi beqembu lakhe, nginesiqiniseko sokuthi izimenenja noma izimfolomane zakhona zishintsha mihla namalanga.
Ngo-2012 ngesikhathi uMpengesi eqasha uManqoba Mngqithi, oseyiphini likaPitso Mosimane kwiMamelodi Sundowns, ngazitshela ukuthi nazo-ke, ibambe ngakho, uChippa uyayazi-ke into afuna ukuyenza ngeqembu lakhe. Phela uMngqithi ngumqeqeshi engimhlonipha kakhulu ngakho nganginesiqiseko sokuthi wayezoyenza ivuthe bhe iChippa ngesikhathi enikwa ithuba. Ngathi ngisamunyunga lowo muzwa wagadla uMpengesi, wamxosha uMngqithi ngemuva kwemidlalo emibili nje vo. Ngiyayazi nento okuthiwa ukumangala, kodwa lokhuya kwangishiya ngikhexe umlomo.
Uma kukhulunywa ngoRoger Sikhakhane, okumanje ucija iRoyal Eagles, ngicabanga ukuthi kwayena lo mqeqeshi useyahluleka ukubala ukuthi usexoshwe kangakhi abuye abuyiswe kwiChippa. Ngiyazi ukuthi akulula ukwazi zonke izinto ezisuke zenzeka ngaphakathi eqenjini kodwa ukuxosha kukaMpengesi kubukeka kunogcobho phakathi. Namanje ngisazibuza, ngabe uyalazi kahle ibhola?
UMalesela uxoshwa nje iChippa ibisadlale imidlalo emithathu kuphela yeligi. Yebo, ngiyavuma ukuthi ubengakawini njengoba eshaywe kwemibili wase edlala ngokulinga kowodwa. Ingabe lokhu bese kusho ukuthi kumele akhonjwe eza ngayo? Naye uMalesela akaqali ukuxoshwa kwiChippa. Ngesizini edlule uchithiwe kwalandwa uTeboho Moloi naye ogcine echithiwe kwalandwa uVladislav Heric. UMalesela ubuye ekuqaleni kwesizini ngemuva kokuchithwa kukaHeric obekubhekwe ukuthi nguyena obezozibamba kule sizini.
UMpengesi ubukeka enesifo sokuxosha engingazi ukuthi sibizwa ngaliphi igama. Emlandweni wePremier Soccer League (PSL) angikhumbuli kukhona usihlalo weqembu oxosha njengoMpengesi, uziqophela owakhe nje umlando ongemuhle.
Ngike ngizwe kuthiwa uMpengesi usondelene kakhulu nosihlalo we-Orlando Pirates u-Irvin Khoza. Kuyaziwa-ke ukuthi uKhoza uphinde abe wusihlalo wePSL kanti usondelene kakhulu noKaizer Motaung, ongusihlalo weKaizer Chiefs, noPatrice Motsepe ongumengameli weMamelodi Sundowns. Womathathu la madoda engiwabale ngenhla awavele axoshe umqeqeshi nje ngoba nakhu ehlulwe yimidlalo emithathu ilandelana, ngakho uMpengesi kumele afunde kuwona.
UPitso Mosimane wake waba nenkinga enkulu esanda kufika kwiSundowns abalandeli bethi abamudle luhlaza ngoba imiphumela ingacaci. UMotsepe wabekezela wamnika ithuba uMosimane. Angifuni nokuchaza ukuthi ukubekezela kukaMotsepe kumsize ngani ngoba kuyaziwa ukuthi yini aseyizuzile uMosimane neSundowns kumasizini edlule.
UMotaung uyaziwa naye ukuthi akatatazeli axoshe umqeqeshi uma izinto zingahambi kahle kodwa uyamnika ithuba. Baningi nje ababefuna axoshwe ngokushesha uSteve Komphela kodwa uMotaung wangayingena leyo wamnika ithuba lokuzibonakalisa. Ukuthi akukho ndebe ayitholile uKomphela ngesikhathi ekwiChiefs akusho lutho kodwa ngeke akhale ngokuthi akalinikwanga ithuba.
Njengoba ngishilo angiyena ungoti uma kukhulunywa ngonobhutshuzwayo ngakho angazi noma kukhona yini umehluko awubonayo eqenjini lakhe uMpengesi ngokupheka ethulula abaqeqeshi. Engikwaziyo nokho ukuthi iChippa ibingekho kwiTop 8 ekupheleni kwesizini edlule kodwa nalapho ngeke ngilimise ngesihloko elokuthi kubangelwe ukushintsha abaqeqeshi njalo. Nokho ngizoqhubeka ngibhale lokho engikwaziyo ngishiye uMpengesi phansi mhlawumbe ulazi kangccono kunami ibhola.