Bagxeka umdanso obizwa ngeKiki Challenge
UGXEKWA nxa zonke umdanso obizwa ngeKiKi Challenge abawenzayo abaphuma imoto ihamba. Lo mdanso kuthiwa uqalwe usomahlaya uShiggy ophuma imoto ihamba edansela ingoma kaDrake ethi Kiki Do You Love Me.
Umqondisi weMasterDrive, uMnuz Eugene Herbert, uthe ukusebenzisa imoto ngalolu hlobo kuyathusa.
“Ukuphuma imoto ihamba bese uyahamba eduze kwayo ibe iqhubeka ihamba kungaholela ekulimaleni kanzima ngisho nokufa, uma kungakenzeki lokho kumanje. Kwesinye isigameko, indoda esencane ishayiswa yimoto ezayo ngesikhathi idansa eduze kwemoto. Omunye waphoseka ebhulohweni ngsikhathi eshayiswa yimoto,” kusho uHerbert.
“Ngisho ngabe uyakwazi ukubona indawo okholwa ukuthi iphephile ezimotweni ezizayo kodwa ziningi ezinye izinto ezingahamba kabi. Umshayeli wemoto kumele aqaphele ezinye izinto ngokuhamba ngemoto evulwe isicabha nomuntu oseceleni kwakhe. Abashayeli yibo abathatha ama-video lokho okudala ukuphazamiseka. Abadansi basengozini yokulinyazwa yimoto eseduze kwabo nezinye izinto. Enye i-video engiyikhumbulayo ikhombisa imoto ima ngokushesha kodwa umdansi uyaqhubeka uya kuyo,” kuqhuba uHerbert.
Iziphathimandla zakwamanye amazwe nazo ziyawugxeka lo mdanso ngenxa yobungozi bawo. Abanye basabisa ngokuvulela icala ababanjwa benza iKiKi Challenge.
Omunye ofana nalo mdanso yiBaby Shark Challenge. Isikhathi esiningi abantu bawenza eduze nemoto ehambayo kodwa kwezinye izikhathi kuba yimoto ehambayo. Nezingane ziyabonakala ziwenza noma zingabagibeli emotweni.
“Imoto akumele isetshenziswe njengethoyizi. ENingizimu Afrika kunesibalo esingamukelekile sabantu abashona emgwaqweni. Sinxusa abantu baseNingizimu Afrika ukuthi bengasinyusi isibalo ngokwenza izinto ezingenasidingo neziwubudedengu,” kusho uHerbert.