Kufe oyedwa omunye walimala bezama ukuduna imoto yephoyisa
KUFE oyedwa kwalimala omunye ngesikhathi abalisa ababili bezama ukuduna imoto yephoyisa (37) ebelilinde ukuvulelwa yirobhothi kwa-V eMlaza.
Kuthiwa abalisa bangene emotweni yephoyisa ebelihamba ngesikhathi kwenzeka lesi sigameko esenzeke emuva kwehora lesishiyagalolunye ngoMgqibelo ebusuku.
Okhulumela amaphoyisa KwaZulu-Natal, uCol Thembeka Mbhele, uthe iphoyisa belihamba ngomgwaqo uMangosuthu Highway livalelwe yirobhothi ngesikhathi kuphoseka abalisa ababili emotweni yalo.
“Laba balisa bamkhombe ngesibhamu bamtshela ukuthi akashayele imoto aye endaweni thizeni esemgwaqweni uNyathela Road. Ukhiphe isibhamu sakhe wadubula abasolwa kwashona umlisa oneminyaka engu-33 kwalimala omunye. Lona olimele uphuthunyiswe esibhedlela lapho egadwe khona ngamaphoyisa,” kusho uCol Mbhele.
Uthe amaphoyisa avule amacala okuzama ukuduna imoto nedokodo.
Ngokuthola kweSolezwe kuthiwa iphoyisa belihamba ngoMangosuthu Highway likwa-V ngesikhathi lifica irobhothi livalile.
Kukholakala ukuthi kube sekuqhamuka umlisa ongaziwa wacela u-lift.
Iphoyisa lizamile ukuvala izicabha lisebenzisa i-central locking kodwa wangakwazi njengoba lo mlisa evule isicabha somgibeli wangena phakathi.
Kube sekuqhamuka omunye umlisa wangena esicabheni sangemuva. Kuthiwa omunye walaba balisa ukhiphe isibhamu watshela iphoyisa ukuthi alishayele imoto liye kuphi.
Kuthiwa bathe uma befika kwa-P eMlaza bazama ukuliphoqa ukuthi lehle emotweni nokuyilapho okusuke khona uthuthuva labadubula kwashona oyedwa kwalimala omunye.