Usethi khumu kwezombusazwe
USOMLOMO kamasipala wesiFunda uThukela KwaZulu-Natal oke wathukwa ngokusungula umfundaze wezintombi nto, useyishiya phansi ipolitiki yaseNingizimu Afrika ngemuva kweminyaka eyisishoshovu kwezombusazwe nasezinyunyaneni zothisha.
UNksz Dudu Mazibuko ukusho lokhu ekhuluma neSolezwe ngemuva kokufaka incwadi yakhe yokwesula esikhundleni sokuba wuSomlomo womkhandlu wamakhansela kaMasipapa wasoThukel aselokhu ahlala kuso kusuka ngemuva kokhetho lwango-2016 Agasti.
Ushiye esikhundleni singakapheli isikhathi sakhe ngoba bekumele agcine ngo-2021.
“Ngibone sekufike isikhathi sokuba ngishenxe kwezombusazwe ngemuva kweminyaka ngisebenzela abantu bakithi ngokuzikhandla. Lokhu angikwenzanga ngoba nginengcindezi kwezepolitiki noma kumasipala kodwa ngibone kuyisikhathi sokuba ngikhule ngingene kweminye imikhakha. Ngingumuntu wesifazane oyiqondayo ipolitiki njengoba ngiyincele kubaholi abaningi bakaKhongolose engingabala kubo uNdunankulu uWillies Mchunu nomhlonishwa uGaba Makhathini ongasekho. Udaba lomfundaze wezintombi nto wawusenhliziyweni yami ngoba ngangifisa izingane zethu zigqugquzeleke ukuba zifunde ngaphandle kokuvuma ukuphazanyiswa yizilingo zomhlaba. Ingcindezi engabhekana nayo ayinginikanga ukuthula ngoba kwakuyinto engangibona izokusa isizwe sethu phambili,” kusho uNksz Mazibuko.
UNksz Mazibuko, enye yeziMeya ebezidumile KwaZuluNatal kule minyaka edlule, uthe usezoba yisikhulu esiphezulu seDistrict Economic Development Agency, ezoba wuhlaka oluzimele lukaMasipala wasoThukela KwaZulu-Natal oluzogxila ekuheheni abatshali zimali abazothuthukisa umnotho woThukela. Lolu hlaka lwethulwe ngoJuni. Uthe namhlanje njengoba kunguMsombuluko kuzoba wusuku lwakhe lokuqala emsebenzini wakhe omusha ongasahlangene nepolitiki.
UNksz Mazibuko uke waba sematheni eminyakeni edlule egxekwa ngokuba yiMeya ebithanda ubumnandi ngenxa yokuthi ngesikhathi eseyiMeya yaseMnambithi, osekuyi-Alfred Duma Local Municipality, wayekhonze ukuhlela imicimbi yentsha yokujabula.
Uqale ngeminyaka yawo-1990 ukuzihlanganisa nepolitiki ngesikhathi eseyisishoshovu seSADTU, inyunyana yothisha, aye nguNobhala wegatsha langakubo eZakheni okuyilaho ayefundisa khona. Ngo-2000 waqokelwa ukuba yikhansela le-ANC ngesikhathi umkhandlu usaphethwe yinhlanganisela yeNew National Party, Democratic Alliance ne-IFP. Ngo-2006, uNksz Mzibuko wakhethwa waba yiMeya yokuqala yesifazane yaseMnambithi ye-ANC.
Ngo-2011 i-ANC yamjuba ukuba abeyiMeya yasoThukela okuwumkhahndlu ophethe bonke omasipala basoThukela.
Ngo-2016, uKhongolose waphinde wamjuba wabe usumenza uSomlomo khona oThukela nokuyisikhundla azibeke phansi izintambo zaso ngoLwesine.
Uthe yize eyishiya ipolitiki kodwa usazoba yilungu lokuqina le-ANC kodwa elejwayelekile, elingekho kwezombusazwe.
“Ubumnandi sonke siyabuthanda kodwa wukuthi sithanda obungafani. Ngakho lokhu ababekusho ngami anginankinga nakho. Mina ngiyenze imidlalo yethu ehlelwa yibo bonke omasipala, yaba eyehluke kakhulu ngoba besilanda oDJ nabaculi bese kuthi uma kudlalwa ibhola zibuye ziwe abantu bazijuxuze ngoba phela nalokho kuyingxenye yokuletha intuthuko kubantu ukuze bahlale bethokozile,” kuphetha uNksz Mazibuko.