Bakhaliswa yizimo abasebenza kuzona
BAFUNA kusukunyelwe izinkinga ezikhungweni zezempilo KwaZulu-Natal abasebenzi abangamalungu eNational Education Health and Allied Workers’ Union (Nehawu) ababhikishe ngaphandle kwamasango esibhedlela saseThekwini, i-Addington ngoba bekhala ngezimo ezingezinhle zokusebenza kulesi sibhedlela.
Ezinye zalezi zinkinga ngezokuphepha, ukungaqashwa kwabasebenzi bezempilo nokungahambisi kahle kophethe ezokuqasha esibhedlela.
UNobhala weNehawu esifundeni iTheku, uMnuz Ayanda Zulu, uthe bakhathazekile ngesimo sezikhungo zezempilo kulesi sifundazwe.
Uthe lokhu kuholele ekutheni baqale umkhankaso wokugqamisa izinkinga zezikhungo zezempilo okubalwa kuzo isibhedlela i-Addington.
Uqhube wathi bafuna uNgqongqoshe wezeMpilo esifundazweni, uDkt Sibongiseni Dhlomo, axazulule izinkinga ezikhona esibhedlela.
UZulu uthe ezinye zezinkinga ezikhona esibhedlela ukushoda kwabasebenzi waveza ukuthi uma abasebenzi besula akuqashwa muntu ezikhaleni zabo.
Uthe kunemininingwane ebucayi yabasebenzi edukayo okuholela ekutheni bagcine benganyuselwa amaholo ngendlela.
UZulu uthe okunye okubakhathazayo wukuthi umnyango awuzange uphenye emuva kokuvela kwezinsolo ezazibikwe ngomphathi mayelana neziqu zakhe.
“Kunenkinga yokuxutshwa kweziguli esibhedlela. Iziguli ezilashelwa ukuphazamiseka emqondweni zifakwa emawodini eziguli ezilashelwa ezinye izifo okuyinto engafanele,” kusho uZulu.
Uthe kunenkinga yokunganakwa kulesi sibhedlela.
Uphinde waveza ukuthi isibhedlela sisesimeni esingesihle, sibukeka kahle ngaphandle kodwa ngaphakathi sisesimeni esishaqisayo.
Uthe akusona sodwa lesi sikhungo esinezinkinga kodwa kunezinye ezisesimeni esifanayo.
“Sibhikishe nakwezinye izikhungo okubalwa kuzo isibhedlela sasoSindisweni, emtholampilo iHlengisizwe CHC, eHammarsdale naKwaMashu CHC lapho sifice izinkinga eziningi ezifanayo. Okusikhathaza kakhulu wukuthi kunezinhlelo zokulethwa kweNational Health Insurance. Izolethwa kanjani izikhungo zikulesi simo?” kubuza uZulu.
Uthe bashaqekile bethola ukuthi eHlengisizwe CHC ayikho indawo engamakhaza okugcinwa kuyo izidumbu ngesikhathi kusalindwe imoto yasemakhazeni ukuthi izozilanda. Uthe izidumbu zihlaliswa endlini evulekile. Ukhala ngokuthi kulindwa amahora uma kudingeka i-ambulensi ngoba ayikho ehlala kulesi sikhungo. Usole umnyango ngokwenza izithembiso ezingafezeki wathi bawunqumele ukuthi ubuyise izimpendulo emuva kwesonto ngezikhalo zabo. Abasebenzi basabise ngokungenela ukhukhulela ngoqo wemashi uma bengaphendulwa.
Uhlu lwezikhalo zabasebenzi lwamukelwe ngobambe kwesokuba yinhloko yoMnyango wezeMpilo, uDkt Musa Gumede, othembise ukuthi umnyango uzobuyela kubasebenzi nezimpendulo ezinsukwini eziyisikhombisa.