Ungoti ugxeka uhulumeni ngemfundo engagculisi
UNGOTI wezemfundo owaziwayo ngokugxeka uhulumeni angahlonizi ngokuhluleka ukufukula imfundo yakuleli uSolwazi Jonathan Jansen uthi uma uhulumeni ungase ugxile kakhulu emazingeni aphansi ezemfundo ngeke ibe khona inkinga yezinkumbi zabafundi abashiya phakathi ukufunda bengafinyelelanga kwamatric.
UJansen ozinze eNyuvesi yaseStellenbosch oke waba ngumphathi weNyuvesi yaseFree State, ukhwele wadilika kuhulumeni ngokuthi akayikhathalele imfundo ngoba izingane zosopolitiki zifunda ezikoleni ezingcono.
“Ukuze uhulumeni alungise inkinga yezemfundo kuleli, kumele kugxilwe emazingeni aphansi ikakhulu ezinkulisa (Grade R). Akungagxilwa emazingeni aphezulu ikakhulu emanyuvesi,” kusho uJansen ekhuluma engqungqutheleni yenyunyana yothisha iNaptosa eThekwini ngoLwesihlanu. Uthe izinto zimapeketwane kwezemfundo yingakho abafundi abawuhhafu wesigidi bengafinyeleli kwa-matric beshiya phakathi izifundo.
Usho lokhu nje izinyunyana zothisha zihlale zikhala ngokuthi kumele kuqiniswe emazingeni aphansi ikakhulu uGrade R njengoba othisha bakhona bengaqashiwe ngokugcwele. Imfundo ethathwa njengebalulekile iqala kwaGrade 1. Uthe kukhulu ukwehlukana kwezemfundo njengoba izingane zabacebile zithola engcono.
Unxuse othisha ukuthi bangalindeli uhulumeni ukuthi afukule imfundo kodwa babhukule bazenzele.
“Ningalindeli uhulumeni ngoba ayikho into azoyenza ngoba izingane zongqongqoshe zifunda ezikoleni ezikahle. Sukumani nenzele izingane zabahlwempu ezidonsa kanzima.”
Ukhale kakhulu ngenye yezinyunyana angayidalulanga ukuthi uma iteleka ayifuni kuvalwe izikole zabamhlophe ngoba yilapho kufunda khona izingane zamalungu ayo.
Uthe ucwaningo luyaveza ukuthi umfundi ofunde esikoleni esinayo yonke into, noma lezo ezazaziwa njengazabamhlophe kuba negebe uma umqhathanisa nalabo abafunde ezikoleni zabamnyama wathi leli gebe alibe lisavaleka kuze kuphele iminyaka engu-12 yokufunda.
Ugqugquzele ukuthi kufundelwe abafundi nezingane izincwadi wancoma nothisha bokufika ukuthi bayawazi umsebenzi wabo.
UMnuz Basil Manuel, isikhulu seNaptosa sikhale kakhulu ngokuthi kunenkinga kwiMaths njengoba abafundi beyifeyila.
Uthe izinga lokuphasa lesi sifundo liphansi wathi noma bedlulela kwamanye amabanga aphezulu isimo siba sibi kakhulu.
UNksz Thirona Moodley, isikhulu sale nyunyana kulesi sifundazwe, uxwayise othisha ukuthi bangabacwasi abafundi noma bafake imizwa yabo uma befundisa.
Ukhulume ngesehlakalo sikathisha osulile waseWestville Girls High, osolwa ngokubiza abafundi abamnyama ngegama lokubacwasa eliqala ngo-K.