Imibhunguka mayingadlali ngeKhumbulekhaya
MHLELI: Ngicela ungivumele ngibeke umbono wami mayelana nohlelo oluvezwa kumabonakude, iKhumbulekhaya!
Njengomuntu olulandelayo ngiyaluthanda ngoba luhlanganisa izihlobo okudala zadukelana. Uke ucabange ukuthi ukube kalukho ngabe izohlobo zigcina zingaphindanga zabonana. Ngiye ngithi uma ngibuka izihlobo sezitholene ngifikelwe wukudabuka ngoba abanye batholwa sebaguga, abanye bengasaphili kahle ngokomqondo, abanye sekukhonjwa amathuna.
Kukho konke lokhu engikubalile kodwa izihlobo ziye ziduduzeke ngezihlangabezana nakho, ikakhulukazi uma isihlobo sesashona, ngoba izinhliziyo ziye zithole ukuphumula ngokwazi nje ithuna lesihlobo.
Kunabantu ke abalusebenzisa kabi lolu hlelo, bayabhunguka emakhaya balahle imindeni bese kuthi uma umhlaba sewumshayile bese ecela ukuxhunyaniswa noKhumbulekhaya afuniswe izihlobo kodwa uma sewulalelisisa kahle kutholakale ukuthi uyakwazi kubo futhi kabakaze basuke lapho abashiya khona. Usuke esenamahloni okugoduka noma engenamali. Kokunye unamahloni okuthi uyongena kanjani emndenini ngoba uyazazi ukuthi wahamba kanjani. Abanye baba wukuthola imali bashaye bachithe emakubo noma emizini yabo, baphinde bafunge bagomele bethi bayongena ngebhokisi, uyasuka ke akasashoni kodwa usizi lokukhumbula ekhaya selungaphezu kwamandla noma izingane zakhe sezikhulile zifuna ukwazi imvelaphi yazo.
Ngingafisa ukuthi imibhunguka makungabi yiyona ecela usizo kuKhumbulekhaya kodwa makube yizihlobo ezisuke zingazi ukuthi umbhunguka washona ngakuziphi izinkalo. Umbhunguka uyakwazi ekhaya kawungamosi isikhathi sokuthi kusizakale abantu abadukelene ngempela. Kumele yazi imibhunguka ukuthi lapho icashe khona, uKhumbulekhaya uyeza, kungcono nje umuntu abe encenga kusemanje athwale lokho okuthwalekayo angaze aphoxeke eselandwa kodwa ebe ekwazi kubo noma kwakhe. Kungakuhle futhi kungazwakala kangcono uma kuyizihlobo zombhunguka ezicele uKhumbulekhaya ukuthi azifunise umbhunguka. O’Brien Scara Gcabashe ENANDA