UTrump uyazicanasela nje emazweni ase-Afrika
MHLELI: Kwelakho eliwela umfula ugcwele ngivumele ngibeke umbono wami ngodaba lukaDonald Trump. Kuyadumaza ukuzwa abaholi basemazweni angaphandle bengenelela odabeni lokubuyiswa komhlaba kubaniniwo.
UTrump uyacanasa nje emazweni ase-Afrika, enjalo uyancikisela ngisho nangohwebo. Sengiyaqonda manje ukuthi kwakungani uRobert Mugabe (osesithombeni) wayeziqhelelanisa nabasentshonalanga ikakhulukazi abasemazweni angaphesheya ngoba bathi bengangena ezweni lakho bese bekushayela umthetho njengabakwaGupta. Ngidlulise nje ukubonga kuKhozi FM ohlelweni lukaSipho Mbatha noNongcebo ngokusilethela umhlaziyi osemnkantshubomvu ubaba uNhlahla Mtaka ukuba azosikhanyisela lapho kumnyama khona.
Lokhu okwenziwa nguDonald Trump kuwukuthunaza isithunzi sezwe lethu. Utshengise ububhoklolo waphinde wasibukela phansi. Pho sizotakulwa ngubani kulolu taku? Kuyishwa nokuthi umholi we-EFF, uMnu Julius Malema, akasekho eqenjini elibusayo ngoba izwi lakhe belizozwakala ukudlula lokhu. Ubezokwazi ukumqhelisa uTrump ayeke ukugcwaneka la.
UTrump uyakhohlwa wukuthi siyadingana, wenza sengathi yithina esidinga yena. Uma esekhathele ukusebenzisana nathi akagonyuluke sozibambela kanti iZimbabwe yenza ngani. Asingadanseli isigingci sikaTrump sibe sinazo izimfanelo zokuthuthukisa izwe lethu. Sogcina sesifana neLiberia elanda izinkukhu eBrazil ne-Ethiopia elanda impuphu eMexico ihlulwa ukutshala ummbila izigayele. Yihlazo phela leli singaze nje sivume ukudlala amazwe aphesheya. Freeman Sifundo EMZINGAZI