Kulimale 20 engozini ehlanganisa itekisi ebithwele abafundi
KULIMALE abantu abawu-20 ngesikhathi itekisi ebithwele abafundi ishayisana nezimoto ezimbili ezincane neloli eMkhomazi izolo.
Abafundi bezikole ezehlukene kuthiwa balimale kanzima engozini eyenzeke ekuseni emgwaqweni u-R197.
Okhulumela abezimo eziphuthumayo bakwa-ER24, uMnuz Russel Meiring, uthe kube yinhlanhla ukuthi kungashoni muntu.
“Abezimo eziphuthumayo bakwa-ER24 bafike bathola izimoto ezimbili endaweni yengozi. Abantu abahlukene bebehlezi ngaphakathi ezimotweni abanye behamba ngaphandle. Sithe uma sihlolisisa sathola ukuthi umuntu oyedwa uvalelekile ngaphakathi emotweni ebithwele abafundi kodwa wagcina etakuliwe. Sithole ukuthi bawu-20 abantu abalimele. Abaningi abalimele bekuyizingane eziphakathi kweminyaka eyisihlanu newu-15,” kusho uMeiring.
Okhulumela amaphoyisa KwaZulu-Natal, uCaptain Nqobile Gwala, uthe kuvulwe icala lokushayela budedengu.
“Itekisi ebelithwele abafundi lishayisene nezimoto ezincane ezimbili neloli engozini eyenzeke ekuseni. Amaphoyisa aseMkhomazi avule icala lokushayela budedengu. Akekho oboshiwe kodwa uphenyo lwamaphoyisa luyaqhubeka.”
Khonamanjalo, amaphoyisa aphenya icala lokubulala ngokungenhloso ngemuva kwengozi edlule nemiphefumulo emibili ngesikhathi kushayisana izimoto ezimbili eMtubatuba izolo ekuseni.
Kuyasolakala ukuthi umshayeli weToyota Corolla bekumele ame emgwaqweni kwaMsane kodwa wangama wabe eseshayisana neLand Rover.
Abantu ababili bafele endaweni yesehlakalo. Izidumbu zabo ziyiswe emakhazeni kahulumeni eMtubatuba. Amaphoyisa akwaMsane aphenya icala lokubulala ngokungenhloso.