AbeMK bamise ukusebenza kukamasipala
KUPHAZAMISEKILE ukusebenza kuMasipala iMooi-Mpofana izolo ngemuva kokuthi amalungu omakadebona boMkhonto weSizwe (MK) emise yonke into efuna ukuqashwa kumasipala.
Amalungu eMK akhala ngokuthi athenjiswa imisebenzi yiMeya uMnuz Xolani Duma kodwa manje akasasigcini isithembiso sakhe.
Kuthiwa lawa masosha abevutha engabaselwe aphinde aphazamisa nokusebenza esikhungweni okutholakala kuso amalayisense okushayela.
Umthombo weSolezwe eMooiMpofana okwi-ANC ocele ukuthi ungadalulwa ngoba awuvumelekile ukuthi ukhulume nabezindaba uthe bafuna i-ANC imxoshe uDuma ngoba uxova inhlangano.
“UDuma ukhohlakele kunezinsolo ezithi udayisa nezindlu zomxhaso, kwayena uhlala endlini yomxhaso kodwa ebe eyimeya, akafunwa muntu ngisho nekhokhasi yeqembu kumasipala ayifumfuni,” kusho umthombo.
Uthe umphakathi uthi ngeke uze ulubhade okhethweni ngonyaka ozayo uma uDuma engaxoshwa.
Imizamo yokuthola uDuma izolo, ayizange iphumelele njengoba izingcingo zakhe zombili bezikhala zingabanjwa kanti nomyalezo athunyelelwe wona kuze kwashaya isikhathi sokushicilela engawuphendulile.
Umthombo uqhube wathi umsindo omkhulu usuke ngemuva kokuthi umkhandlu ukhangise izikhalo zemisebenzi ezingu-13.
Ethintwa izolo uSihlalo weMKMVA KwaZulu-Natal, uMnuz Themba Mavundla, uthe akanalwazi ngombhikisho wamalungu abo eMooiMpofana, wacela ukuthi kuthintwe usihlalo wesifunda eMoses Mabhida uMnuz Mzo Kheswa ongazange atholakele njengoba ucingo lwakhe belukhala lungabanjwa.
UMasipala iMooi-Mpofana ungaphansi komlawuli ngemuva kokunqindwa amandla nguMnyango wezokuBusa ngokuBambisana neziNdaba zoMdabu KwaZulu-Natal emuva kokukhungathwa yizinkinga.
Okhulumela i-ANC KwaZulu-Natal, uNkk Nomagugu Simelane-Zulu, uthe ubuholi benhlangano esifundazweni buhlanganile izolo bakuveza ukukhathazeka kwabo ngendlela amalungu eMKMVA enza ngayo izinto uma kukhona anganeme ngakho.
Ukugxekile ukuvalwa komkhandlu wathi akusizi muntu.‘’Siwubuholi besifundazwe sibe sesithatha isinqumo sokuthi sihlangane nobuholi beMKMVA esifundazweni ukuze sixoxisane nabo,” kusho uNkk Simelane-Zulu.
Uthe bona bezwe ukuthi uDuma ubezohlangana namalungu eMKMVA kodwa waphazanyiswa ukuthi uqale wahlangana noMcwaningi-mabhuku okuholele ekutheni kuphazamiseke umhlangano wakhe neMKMVA.