‘Busezinhlakeni zomthetho ubufakazi ngenkohlakalo’
UNGQONGQOSHE weMfundo eyisiSekelo, uNkk Angie Motshekga, uthe bonke ubufakazi obuthinta inkohlakalo ebikwayo eMnyangweni wezeMfundo KwaZuluNatal wabudlulisela ezinhlakeni zomthetho.
UNkk Motshekga ubephendula umbuzo wezintatheli ngemuva kokwethula inkulumo ekanye nabenyunyana yothisha iNatu egubha iminyaka engu-100 yasungulwa enyuvesi yaseZululand, oNgoye.
Kuzokhumbuleka ukuthi le nyunyana yabikela uNkk Motshekga ngenkohlakalo esemnyangweni.
Yayifuna aphenye ngenkontileka yokusatshalaliswa kwamaqakelo ezikoleni zezifundazwe njengoba kwasetshenziswa imali engaphezulu kukaR100 million kuthengwa amaqakelo.
“Yonke into ethinta uphenyo ngayidlulisela ezinhlakeni zomthetho. Yizona okumele ziphenye zikhiphe umbiko,” kusho uNkk Motshekga.
Umnyango wesifundazwe wakuchitha ukuthi usebenzise imali eyevile kuR100 million uthenga amaqakelo.
Umnyango waqala uphenyo ngemuva kokuvela kokuthi ayelahlwa ezikoleni kuthiwa avimbe indawo.
Kuthiwa kwezinye izikole asetshenziselwa ukuvala amawindi uma abafundi beshiswa yilanga, kwezinye bawaphendula amabhola kudlalwe ngawo ngoba maningi kakhulu.
UNkk Motshekga ukhale kakhulu ngokuthi inselelo enkulu abasabhekene nayo wukuhlinzeka ngengqalasizinda esezingeni ezikoleni.
“Iyona nkinga esisabhekene nayo yengqalasizinda ezikoleni. Asikakwazi ukuqinisekisa ukuthi abafundi bafundela ezimeni ezikahle nokuthi othisha bafundisela endaweni enesithunzi,” kusho uNkk Motshekga.
Ubalule ukufundwa kweHistory ezikoleni wathi kubalulekile ukuthi abafundi bazi ukuthi baphumaphi.
Usho lokhu nje kunesiphakamiso sokuthi iHistory ibe yimpoqo kubona bonke abafundi kusukela kwaGrade 10 kuya ku-matric.
“Akhona amazwe lapho ukubhalwa kabusha komlando kusize kakhulu. Sifuna ukuthi iNatu ibe yingxenye yokubhalwa kabusha komlando ozofundwa yizingane. Othisha yibona engibahloniphayo uma bebeka izwi ngezinto ezingalungile kwezemfundo. Abanye basuke bekhuluma izinto abangazazi,” kusho yena.
Ubongele iNatu ngokugubha kwayo iminyaka engu-100.
“Le nyunyana siyayihlonipha kakhulu ngemisebenzi yayo. Ibekhona ngezikhathi ezinzima, zonke ezinye ziphuma kuyona. Sifisa ukuthi iqhubeke eminye iminyaka engu-100,” kusho uNkk Motshekga.
Uthe abaholi bayo, ikakhulu uMengameli uMnuz Siphosethu Ngcobo, ubahlonipha kakhulu wathi ngisho iNatu ingekho emihlanganweni uyazibuza ukuthi ngabe ibizothini ukube ibikhona.