AbeNatu bafuna kucatshangelwe othisha bakaGrade R ngamaholo angcono
“YISONO le nto eyenzeka kothisha bakaGrade R. Siyacela ukuthi kube khona okwenziwayo ukuze bathole isithunzi esibafanele.”
Lesi sicelo senziwe nguMengameli weNatu, uMnuz Siphosethu Ngcobo, kuNgqongqoshe weMfundo eyisiSekelo, uNkk Angie Motshekga, ngokungabhekelelwa kothisha bakaGrade R.
UNgcobo uveze ubuhlungu obubhekene nothisha ethi kudingeka kuze kuguqelwe ongqongqoshe ukuze banyuselwe imali.
“Ibuhlungu le nto eyenzeka kothisha. Siyacela okungenani kube nomthetho ozolawula ukusebenza kwabo. Kokunye bayanyuselwa imali kokunye abanyuselwa,” kusho uNgcobo.
Othisha bakaGrade R KwaZuluNatal bathwele kanzima ngenxa yokuthi abanyselwanga imali. Ubekhuluma engqungqutheleni yeNatu eNyuvesi yaseZululand, oNgoye. Ingqungquthela ihambisana nomgubho weminyaka ewu-100 yasungulwa.
Indaba yothisha bakaGrade R ihlale isezindebeni zezinyunyana zothisha ezifuna banyuselwe umholo.
Zifuna bakhokhelwe njengothisha abajwayelekile, babe nezimfanelo ezifana ne-medical aid, provident fund, bathole nemali yokuthenga izindlu.
Okwamanje othisha KwaZuluNatal bahola ngaphansi kuka-R10 000 ngenyanga.
UNgcobo uthe uyazi kukhona u-2019 wathi akukho okuningi azokusho.
“Ngokwethu besifisa ubuye ngoba kube nozinzo kulo mnyango ngesikhathi sakho. Siyazi kuza unyaka ozayo asazi kuzokwenzekani noma uzohlala noma uzohamba,” kusho uNgcobo.
Usho lokhu nje ngemuva kokhetho lukazwelonke ngonyaka ozayo kuzokhethwa ikhabhinethi entsha.
Lokhu kusho ukuthi uMengameli ozobe ekhona nguyena ozokhetha abantu azosebenza nabo eminyangweni ehlukene.
Bekugcwele phama ehholo iKing Bhekuzulu amalungu ecula egubha iminyaka ewu-100 kwasungulwa inyunyana.