Ayisukunyelwe imfundo esemazingeni aphansi
UYIHLABE esikhonkosini ungoti wezemfundo ngokugcizelela ukubaluleka kokugxila emazingeni aphansi ezemfundo. Umbono kaSolwazi Jonathan Jansen weNyuvesi yaseStellenbosch kawudingi ukunconywa kuphela kepha uMnyango weMfundo eyisiSekelo neminyango yezemfundo ezifundazweni, idinga ukuwufakela izibuko.
UJansen usezakhele igama futhi uyahlonishwa ngemibono nangeqhaza alibambile kwezemfundo.
Ngedledlule uyale waphinde wanxusa amalungu enyunyana yothisha, iNaptosa, ukuthi azimisele ukufukula imfundo ezikoleni ezisemakhaya nasemalokishini ezisantula izinsiza zokufunda ezisezingeni elifanele.
Kumele othisha bazibophezele impela emyalelweni kaJansen, kungabi ngabeNaptosa kuphela kepha bonke.
Ukuze othisha bakwenze kahle lokhu badinga ukwesekwa nguhulumeni okunguye onamandla amakhulu okukhuculula imfundo.
Imfundo emazingeni aphansi idinga ukuthi uhulumeni ayiseke kangcono, kunganakwa kuphela amazinga ephezulu.
Izinselelo uMnyango wezeMfundo osabhekene nazo njengokungaholelwa ngendlela kothisha bakwaGrade 1, ngezinye zezimpawu ezenza sibone sengathi kayikhathalelwe ngendlela imfundo emazingeni aphansi yize ongoti abanjengoJansen behlale belihlaba ikhwelo lokuthi imiphumela iba mihle ngokuqhubeka kwamazinga emfundo uma imfundo eyisisekelo ibisezingeni elikahle.
UJansen ugxeke uhulumeni ngokuthi kawuyikhathalele imfundo eyisisekelo ngoba izingane zeziphathimandla kuhulumeni zivame ukufunda ezikoleni zomntakabani lapho kuqikelelwa khona ukuthi libunjwa liseva.
Siyafisa ukubona kushintsha lokhu, nasezikoleni ezisemakhaya nasemalokishini kuba nezinhlelo nezinsiza ezizokhuculula, zifukule ziphinde zithuthukise imfundo eyisisekelo.
Siyavumelana nombono kaJansen othi uma uhulumeni ekushaya indiva lokhu, kuzoba wumqansa ukuxazulula inkinga yezinkumbi zabafundi abawuhhafu wesigidi, abashiya phakathi ukufunda bengafinyelelanga kwa-matric.