Kuyimbude okubikwe ngekhansela
MHLELI: Amanga angaka siyawaqabuka. Ngabe iphephandaba likaMasipala weTheku, iMetro Beat, lizithathaphi izindaba ezikhuluma ngamakhansela?
Emasontweni amabili adlule livele lasixaka selisenga ezimithiyo ngokusebenza kwekhansela laku-ward 78 eMlaza ekhasini lapho kusuke kwethulwa khona ukusebenza kwamakhansela. Uma ngifunda kahle lithi ikhansela lathatha abantu ababehlala emaxhaphozini eK1. Sicela ukubuza ukuthi iyiphi indawo eyixhaphozi ku-ward 78 ngoba phela indawo eyixhaphozi ihlala izingulube namaselesele. Sicela ukwazi ngaleli xhaphozi.
Okunye esicela ukukwazi wukuthi kwaJ lapho bayiswa khona, abantu bakhona abazidingi yini izindlu? Kwenzeka kanjani ukuthi abantu bakwa K abawu-39 bayofakwa kwa J bese kuthi kwa J kufakwe abantu ababili?
Ikomiti laku-ward 78 alikaze lihlale nekhansela livumelane ngabantu abazofakwa ezindlini ngaphambi kokuthi abantu bayokhonjiswa izindlu zabo. Kuphela into eyenziwa yikhansela ngosuku lokuyofakwa kwabantu ezindlini lasibiza lathi asithi bonke abantu ngabasendaweni. Nathi ngoba siyesaba ukuthi sizoxoshwa ematohweni esiwabambile savuma.
Ngicela ukuthi ababhala ephephandabeni likaMasipala bathinte amalungu ekomiti le-ward nomphakathi ngaphambi kokushicilela udaba, kungavele kubhalwe amanga emini kabha. Ngifisa uSihlalo we-ANC esifundazweni, uMnuz (Sihle) Zikalala, noNobhala, uMnuz Mdumiseni Ntuli, bazozibonela le nto esikhuluma ngayo bezwe nomphakathi ukuthi uthini ngale nto ngoba kuye kube sengathi liyasukelwa ikhansela uma kuthiwa lingundlovukayiphikiswa. Okunye wukuthi kasinikezwa igunya lokuthi sijoyinise abantu ngasemakhaya uKhongolose. Kunalokho kunikezwa izihlobo zekhansela kuphela eziyojoyinisa ezinye izihlobo, hhayi umphakathi waku-ward 78.
Enye into eyenzekayo kunamanye amalungu ekomiti anikwe izindlu ukuze avalwe umlomo khona kuleyo ndawo. Ngabe nawo aqhamuka emaxhaphozini? Kukhona ngisho indlu yomuntu osesejele. Kuningi okungalungile okwenzeka ku-ward 78. Ayikho into eyolunga uma abaholi besifundazwe bengazifikelanga eduze nesikole Imisebe Primary ukuzozizwela konke lokhu engibhale ngakho. Umphakathi uthi sekwanele manje usuhlukunyezwe kakhulu. Sicela isifundazwe singenelele. Okhathazekile UMLAZA -WARD 78