‘Ingcuphe yesifo senhliziyo kobaba abahlala ekhaya’
ISIFO senhliziyo sidlangile kubantu besilisa ikakhulu labo abangobaba abahlala emakhaya. Balinganiselwa ku- 25 961 abantu besilisa abashona ngenxa yalesi sifo.
UNksz Nicole Jennings, okhulumela inkampani yemithi egxile ezifweni ezithikameza ukusebenza kwenhliziyo iPharma Dynamics, uthe abantu besilisa abaningi bafisa ukuba nempilo elula yokuhlala ekhaya kodwa abacwaningi bathi ukushintshela ekubeni wubaba ohlala ekhaya kunganomthelela ongemuhle enhliziyweni.
Uthe lokhu bakuthathela ocwaningweni olwenzelwe i-US National Institutes for Health obelubheka ukuthi imisebenzi eyenziwa abantu inamthelela muni esimeni sabo sempilo.
“Ucwaningo lwalubheka abantu besilisa nabesifazane abangu-3 600 esikhathini esingangeminyaka engu-10 sathola ukuthi abesilisa ababengabayeni abahlala emakhaya esikhathini eside ebudaleni babo bebesemathubeni angu-82% okufa ngenxa yesifo senhliziyo uma beqhathaniswa nabesilisa abasebenza bengekho emakhaya,” kusho uNksz Jennings.
Imiphumela etholakele ihambisane nolunye ucwaningo olwenziwe yiNyuvesi iRutgers e-USA eveze ukuthi kubantu abashadile abangu-1 095 ababhekwe iminyaka engu-30 luthole ukuthi abesilisa abahlala emakhaya lapho kungomama abondlayo bebevame ukuthi babe nezinkinga zezempilo okubalwa kuzo izilonda esiswini nesifo senhliziyo nezinye.
Uthe okuholela ekutheni abantu besilisa abahlala emakhaya babe nalezi zinkinga kungenxa yokuhluleka ukwamukela ukuthi akusebona abanamandla okondla imindeni yabo.
UNksz Jennings uthe obaba abahlala emakhaya kungenzeka bagcine sebebhema kakhulu, bephuza noma bedla ngendlela okungesiyo ngoba bezama ukumelana nesimo sabo sokuzizwa bengasewona amadoda ngenxa yokungakwazi ukondla imindeni yabo. Lokhu kugcina kuholele ekutheni bagcine sebenezifo okubalwa kuzo esenhliziyo, esikashukela nezinye.
Uthe yize sekunoshintsho olukhulu olwenza ukuthi abantu besifazane bagcine besebenza, bondla imindeni, abesilisa abaningi basazibona kuyibona abafanele ukondla imindeni yabo. Lokhu kubenza bazizwe behlelwa yisithunzi uma amakhosikazi abo nophathina babo kuyibona abondla imindeni yabo.