Ihlafunile iChiefs ngokuhamba kukaShabba
UKUSAYINA kukaSiphiwe “Shabba” Tshabalala (33) inkontileka yeminyaka emibili eqenjini laseTurkey elikhuphukele esigabeni esikhuluiTurkish Super Lig kule sizini i-Erzurumspor, kushiye Amakhosi ehleka wodwa njengoba kuvela ukuthi ahlafune imali ebalelwa ku-R6,5 million. Amakhosi akuqinisekise ngoAgasti 28 ukuthi lolu qweqwe oluyisithandwa sakho konke okuxhumene naleli qembu luzobhekisa amabombo e-Europe lapho luyoqala khona impilo entsha. Njengoba Isolezwe lazi ukuthi inkontileka kaShabba neChiefs ibiphela ngoJuni 30 ka-2020, ukuhlafuna imali engaka ngomdlali osekwenzele konke yinto eyamukelekile uma uzobheka neminyaka yakhe. Lo mdlali uhlale iminyaka engu-11 nohhafu kwiChiefs wazidla zonke izicoco ezikhona ebholeni elikhokhelayo eNingizimu Afrika naleli qembu. “Umndeni wonke weKaizer Chiefs uthanda ukubonga uSiphiwe Tshabalala ngakho konke abeziphethe ngayo enkundleni nangaphandle kwayo sizoqhubeka nokuyisebenzisa njengesibonelo kubadlali abazimisele ngokuhamba ibanga elide ebholeni,” ibhale kanje iChiefs ekhasini layo le-twitter.
n Khonamanjalo uBongani Zungu uphume ngohlaka enkundleni iqembu lakhe i-Amiens yaseFrance ibambana neSaint Etienne. Lo mdlali ulimala nje ulindelekile kwiBafana Bafana ezobhekana neLibya kowokuhlungela i-Afcon ngoMgqibelo.
Uzakwabo kwiBafana, uKeagan Dolly ungene sekusele imizuzu embalwa kodwa banqoba ngo 1-0 kwiRemis obese kuyiwini yesithathu kulandelana kusukela isizini iqalile.
ULebo Mothiba okuvela ukuthi uthengwe ngetshe le mali ubonakale okokuqala eqenjini lakhe elisha iStrasbourg ekhale ngaphansi ngo 3-2 uvela kwiNantes. UMothiba usuke kwiLille khona eFrance ngosuku lokugcina lokushintshana ngabadlali e-Europe.
Ubengekho nakulokhu uMay Mahlangu eqenjini lakhe elisha iLudogorets yaseBulgaria ngesikhathi linqoba kwiDunav ngo 3-1. UKamohelo Mokotjo weBrentford ungene esuka ebhentshini obese kungokwesihlanu kusukela iqalile iligi yeChampionship e-England. Okuhle ukuthi iBrentford inqobe ngo 2-1 kwiNottingham Forrest.
Nakuba ewudlale wonke oweVittese eHolland kodwa uThulani Serero ulale inhliziyo iqaqamba kwazise i-Ajax Amsterdam ayeyidlalela ibanenebule ngo 4-0 ovuthayo bedlalela ekhaya.
Omunye umdlali wakuleli obesekundleni umdlalo wonke beshaywa yiBeerschot-Wilrijk ngo 1-0 uPercy Tau obedlala okokuqala koweligi kwiRoyale Union Saint-Gilloise, egijima esigabeni esingezansi kwesikhulu
eBelgium.