Akafuni bayeye iLibya oweBafana Bafana

KUFANELE bakuthathe bakufake ezingqondweni zabo abadlali beBafana Bafana okushiwo umqeqeshi wabo uStuart Baxter ngeqembu lesizwe laseLibya ngoba uma bengakwenzi lokho kungenzeka kubaphinde okwenziwe yiCape Verde ibakhahlelela ngaphandle kweyeNdebe yoMhlaba ebiseRussia muva nje.

IBafana izokwamukela iLibya emdlalweni wokuhlungela i-Africa Cup of Nations (Afcon) ngoMgqibelo eMoses Mabhida Stadium, eThekwini.

Ngokomlando iLibya ayazelwa lutho ebholeni futhi ikleliswe kunombolo 86 emhlabeni kodwa lokhu akusho ukuthi kumele ithathwe kancane. Imidlalo yasekhaya iyidlalela e-Egypt ngenxa yezimpi ezihaqe iLibya.

UBaxter uthe unovalo ngaleli qembu kodwa lungaphela uma abadlali bakhe bengabheki ukuhlangana namagama abadlali abaziwayo emhlabeni kepha babheke indlela abazokwenza ngayo ngoMgqibelo ngo-3 ntambama.

UBaxter uthe iLibya izokuba yingozi kubona uma beyithatha kancane ngoba ihlangene futhi useke wayibona ishikilisa amazwe ahlonishwayo e-Afrika njengeMorocco.

Phakathi kwamaqembu adlalelwa abadlali beLibya kukhona iRaja Casablanca yakhona eMorocco‚ Vitoria S.C. B neChavez asePortugal ne-Orlando City egijima kwiMajor Soccer League yase-USA. Leli qembu lesizwe libunjwe kakhulu ngabadlali be-Al-Ahli Tripoli. Kuvele imibiko yokuthi bangase bangabibikho kodwa eNingizimu Afrika abeTripoli ngokwemiyalelo yeqembu ehambisana nazo belu izibhelu ezijwayele ukusuka eLibya.

“I-Libya ayinabo abadlali abaziwayo emhlabeni njengeCameroon, Senegal, neNigeria kodwa kumqoka ukuthi sifunde manje ukuthi amagama awasho lutho kepha yindlela enidlale ngayo ekhulumayo,” kusho uBaxter ememzela isikwati sakhe.

Kumqoka okushiwo uBaxter ngoba iLibya ivule imidlalo yamaqoqo ngokunenebula ngo 5-1 iSeychelles ezodlala kabili neBafana ngenyanga ezayo, okuyenza ihlale eqhulwini eqoqweni.