‘Umfowethu usezingeni eliphezulu’
U-ANTHONY Gordinho uthi akekho umdlali wasemuva osizingeni eliphezulu njengomfowabo, uLorenzo, osemabhukwini eKaizer Chiefs kodwa obolekiswe kwiBloemfontein Celtic.
Ngokusho kuka-Anthony, uLorenzo usezingeni eliphezulu kakhulu. Selokhu kuqale isizini kwi-Absa Premiership ubengakamboni umdlali wasemuva ofika kumfowabo ngokudlala.
Engxoxweni ekhethekile abe nayo neSolezwealeli, u-Anthony uthe okufakazela lokhu wukwenza kahle kweSiwelele esilele isibili kwilog ngamaphuzu ayishumi emidlalweni emine.
Kuze kube manje iCeltic, ecijwa nguSteve “Mphathi Komphela, ayiyazi induku. Inqobe imidlalo emithathu, yadlala ngokulingana kowodwa. Emidlalweni ezisayidlalile, ezikaKomphela zisangenelwe ngamagoli amabili. ULorenzo udlala no-Alfred Ndengane maphakathi emuva kwiSiwelele.
“IChiefs ekwenze kuye noma ngabe kunjani, ukwamukelile waqhubeka wadlala lapho asedlala khona. Nginethemba futhi lokuthi uma engabuyela kwiChiefs engalithola ijezi. Ngokwami ukubona akekho umdlali wasemuva njengamanje osezingeni likaLorenzo. Uma ekhona ubani?,” kusho u-Anthony osemabhukwini eBidvest Wits embolekise kwiRoyal Eagles eyibamba kwiNational First Division (NFD).
Eqhubeka echaza u-Anthony odlala esiswini uthi kusukela kudala bebenephupho nomfowabo ngeBafana Bafana.
“Kusuka kudala besinephupho lokugijimela iqembu lesizwe . Besiyaye sithi uma sixoxa, sivumelane ngokuthi mina ngizodlala phambi kwakhe (esiswini), yena angilandele ngemuva (kwazise udlala emuva). Leli phupho asifuni nakancane lishabalale. Sifuna ukuba yizinsizwa zakwaGordinho ezizoqopha umlando ebholeni lakuleli zidlalele iqembu lesizwe. Ngenxa yokuthi siyazimisela, futhi sinentshisekelo, angingabazi ukuthi iphupho lethu lizofezeka ngelinye ilanga,” kusho u-Anthony oqhube wathi nakanjani ngesizini ezayo uzogijima kwi-Absa Premiership.