Abe-EFF nethemba lokuwina ukhetho
UMHOLI wenhlangano yabafundi ye-EFF, i-EFF Student Command KwaZuluNatal, uMnuz Gazuzu Nduli, uthi kabangabazi ukuthi bazokwenza kahle okhethweni lwangonyaka ozayo ngemuva kwemiphumela yakamuva okhethweni lwabafundi ezikhungweni zemfundo ephakeme.
I-EFF Student Command isanda kunqoba ukhetho eDUT yathatha zonke izihlalo eziyisishiyagalombili ebezibangwa.
Ukunqoba kweStudent Command eDUT, kulandele ukunqoba kwale nhlangano esikhungweni iTUT eMalahleni, eMpumalanga, nakwamanye amanyuvesi ezweni lonke.
Engxoxweni neSolezwe izolo, uNduli uthe imiphumela abayithole eDUT naseTUT ikhombisa ukuthi bazoba yingozi okhethweni lwangonyaka ozayo.
“Ne-ANC ukuze ikwazi ukungena kubantu emphakathini yaqala yangenisa kubafundi ezikhungweni zemfundo ephakeme, njengoba nathi senza, iDUT eThekwini inabafundi abangaphezu kuka-30 000, njengoba laba bafundi besithembe ngevoti labo lapha esikhungweni bangaphinda futhi bavotela iqembu lethu noma sesisokhethweni ngonyaka ozayo,” kusho uNduli.
Uthe basazoziphatha zonke izikhungo zaseKZN njengoba naseMangosuthu bebona sengathi bazonqoba.
“Abafundi bakhathele inhlangano yabafundi iSasco ehambisana ne-ANC, manje sebencamela ukunika thina ivoti labo ngoba sebebonile ukuthi yithina esilwela izimfuno zabo ngaphandle kokwesaba. Uma ubheka abafundi ababoshwa kakhulu ezikhungweni zemfundo ephakame abeStudent Command, ngikhuluma nawe nje namhlanje kade ngisecaleni njengoba ngiboshelwe icala lokuhola isiteleka eDUT ngesigamu sonyaka esedlule. Omunye uzakwethu uBonginkosi Khanyile naye udonse izinyanga ejele waze watholwa enecala lokulwela abafundi. Uma sekuvotwa abafundi bayazikhumbula zonke lezo zinto yingakho bevotela thina,” kusho uNduli.
Umkhulumeli we-EFF kuzwelonke, uDkt Mbuyiseni Ndlozi,, uthe ukunqoba kwabo ezikhungweni zemfundo ephakeme kukhombisa ukuthi i-EFF isazophatha eNingizimu Afrika.
“Laba bafundi abasezikhungweni zemfundo ephakame yibona abazophinde basivotele noma sekunokhetho ezweni,” kusho uNdlozi.