Kuqanjwe ibhilidi ngoMama uLuthuli
UMASIPALA waKwaDukuza uhloniphe uMama Nokukhanya Luthuli, inkosikazi yowayengumengameli we-ANC, inkosi Albert Luthuli, ngokuthi uqambe ngaye ibhilidi likaMasipala likaR2 million eliseBallito.
IBallito Civic Building, isiqanjwe kabusha ngoMama uLuthuli ngenhloso yokumhlonipha ngeqhaza lakhe emzabalazweni.
UNkk Luthuli kuthiwa nguyena owayeyinsika kaLuthuli waseGroutville futhi kunguye owayemgqugquzela ukuthi aqhubeke nokuhola umphakathi.
Uphinde abalwe nezinye izishoshovu zabesifazane ezifana noMama Albertina Sisulu noMama uWinnie Mandela ezazisesandleni sobunene kubayeni bazo ngesikhathi belwa nengcindezelo.
IMeya yaKwaDukuza, uMnuz Ricardo Mthembu, ithe lokhu abakwenzayo kokuvula leli bhilidi eliqanjwe ngoMama uLuthuli kuhambisana nenyanga yabesifazane yize isidlulile.
“Lo mcimbi bekumele ngabe siwenze ngo-Agasti kodwa ngenxa yezimo ezithile sigcine singakwazanga ukuwenza njengoba sesiwenza sekuqala uSepthemba okuyinyanga yamagugu,” kusho uMthembu.
Uthe bathathe isinqumo sokuthi baqhubeke nalo mcimbi yize esedlulile u-Agasti ngoba bebefuna ukugcina umlando wale ngqalabutho yomzabalazo.
“Umama wethu wabamba iqhaza elikhulu emzabalazweni njengoba wayenguthisha kodwa ekwazi futhi ukuhlanganisa abantu besifazane, ebafundisa ukulima nokutshala. Namhlanje sibona abantu besifazane kuthiwa bayahlupheka kodwa benazo izandla bengaziphilisa uma bengafundiswa ngempilo yabantu abafana noMama uLuthuli,” kusho uMthembu.
Uthe abantu besifazane kumele bafunde ukuzimela ukuze bakwazi ukuziphilisa ngaphandle kokuthembela kwabesilisa.
Umzukulu wenkosi Luthuli, uMnuz Mthunzi Luthuli, uthe bajabule ngesinqumo esithathwe wuMkhandlu waKwaDukuza ngokuthi uhloniphe ugogo wabo.
“Okusijabulisa kakhulu ukuthi siyalazi iqhaza elabanjwa ngugogo esiza umkhulu ekuqhubeni umzabalazo,” kusho uLuthuli.